RF Mudafaa nazirligi tanıdı ki, ilk qış ayınıñ 26-sında Kefege ücüm vaqtında "Novoçerkassk" desant gemisi bozuldı. Bildirildi ki, Ava mudafaası sisteması, raketa uçurğan eki ukrain Su-24ni "mahv etti". Faqat, Ava quvetleri RFnıñ bildirmesini isbatlamadı.
"Radio Svoboda"nıñ canlı yayınında USQniñ Ava quvetleriniñ nutuqçısı Yuriy İsnat bunı bildirdi.
"Elbette, (RFnıñ bildirmesini – müar.) doğru olğanını isbatlamayım. Olar er kün öz vesiqalarında beşer uçağımıznı "mahv eteler". Bunıñ içün başqa bir varianrt yoq – buña inanmaq kerekmey. Su-24M, taktik aviatsiya taqımınıñ uçaqlarıdır, olar Starokonstântınivde buluna. Añlaşılır ki, şimdi uçaqlar "evde oturmay", şimdi uçaqlar operativ uçaq limanlarında arbiy vazifelerini yapa. Elbette, Rusiye ealige uçaqlarımıznıñ mahv etilmesinen bağlı haberlerin añlatmağa tırışa. Öz vesiqalarında uçaq taqımlarını mahv eteler. Yani nasıldır KHV ya da Telegram kanalları degil, resmiy vesiqalarında bu yañlış malümat yazalar. Vesiqalarğa köre bir ayda aviatsiyanıñ bütün arbiy taqımını mahv ete ekenler. Buña baqmadan, olar F-16 da "mahv etmege" başladılar. Bunıñ içün uçaqlarımıznıñ mahv etilmesinen bağlı rus vesiqalarına inanmaq kerekmey", – dep İgnat ayttı.
Ukraina AQniñ reberliginiñ vekili, bozulğan "Novoçerkassk" rus desant gemisiniñ silâ ketirmek içün qullanıla bilip bilmegenini tefsir etkende ayttı ki, "patlama iç bir şey vastasınen olamadı".
"Bu, silânıñ patlanması edi, tehnika ve silâ, askerlerni ketirmek içün büyük desant gemisi qullanılğan edi. Bunıñ içün de onıñ adı desant edi. Öz yükini alıp, tezce bir yalıdan başkasına ketirmek içün qullanılğan edi. Bu gemi, işğal etilgen topraqlarğa, ayrıca Zaporijjâ yönelişine, Kefege yüklerni, silâ, "Şahed"lerni ketirmek içün qullanıla bilgen edi. Duşman er vaqıt "Şahed"ler vastasınen ateş aça. Ve ümüt etemiz ki, çoq silâsınıñ mahv etilmesi, nasıldır kart-blanş bizge bere bilir", – dep ayttı o.
Ava quvetleriniñ bildirgenine köre, gece saat tahminen 02:30ta ukrain taktik uçaqları qanatlı raketalarnen RF Qaradeñiz flotunıñ Kefe rayonındaki "Novoçerkassk" büyük desant gemisine ateş açtılar.
Keçenlerde vaqtınca işğal etilgen Qırımdaki Kefe şeeriniñ sakinleri, şeer üzerindeki şiddetli patlamalar ve limandaki yanğın aqqında haber berdiler. Qırımnıñ işğal başı Sergey Aksönov, Kefe limanına "ücüm"ni bildirdi.
Patlamalar neticesinde yaralanğan insanlar bar, bir insan öldi. Demiryol vokzalı da bozuldı. Şu cümleden, patmala dalğasınen pencereler çıqarıldı, qaba sılav töküldi. Kefeden Canköyge trenler vaqtınca "Ayvazovskaya" stantsiyasından ketecek. Liman yanındaki binalarnıñ pencereleri ve cam qapuları patlamadan çıqarıldı.
Telegram ve Facebookta Suspilne Qırım haberlerine abune oluñız