Areketniñ nutuqçısı Yaroslav Bojko şahsında Ukrainanıñ vaqtınca işğal etilgen topraqlarındaki qarşılıq areketi "Sarı şerit", qıyın şaraitte çalışqan göñülli teşkilâtlarğa bağışlanğan "Dayanğan insanlar yanmaycaqlar" mukâfatını aldı. Ukraina prezidentiniñ Qırım MCdeki daimi vekili Tamila Taşeva mukâfat berdi.
Telegramda "Sarı şerit" bu aqqında haber berdi.
"Bu mukâfat, işğalni tanımağan ve duşmanğa qarşılıq köstermege devam etken Ukrainanıñ vaqtınca işğal etilgen topraqlarınıñ bütün sakinlerine aittir", — dep bildirildi.
İlk qış ayınıñ 6-sında göñülliler, gönüllü teşebbüslerniñ vekilleri ve areketler içün Umumiyse ukrain göñüllilerniñ dayanıqlığı forumı çerçivesinde "Dayanğan insanlar yanmaycaqlar" mukâfat merasimi keçirildi.
Aynı zamanda öz Facebook saifesinde Taşeva yazdı ki, işğal astında bulunğan ukrainalılarnıñ qarşılığını ürmet ve qayd etmek kerek.
"Sarı şerit" qarşılıq areketiniñ nutuqçısı Yaroslav Bojkoğa mukâfat berdim, tedbirniñ iştirakçilerine hayırlav sözlerini ayttım ve bizim Ğalebemizni yaqınlaştırmaq içün bu qıyın zamanlarda çoq ğayret köstergen bütün göñüllilerge teşekkür bidirmek imkânı aldım", — dep Ukraina prezidentiniñ QMCdeki daimi vekili qayd etti.
Onıñ sözlerine köre, deyerli 10 sene evel, Qırım işğal etilgende Rusiyenen cenk başlandı. O zaman bloklanğan qırım arbiy qısımlarında askerlerge ilk arbiy göñülliler, ukrainalılar ve qırımtatarlar faalca yardım ettiler. Olar askerlerge aşk suv ketire ediler, olarnıñ cep telefon esaslarına para yolladılar.
"Halqımıznıñ çeşitli şekillerde qarşılıq köstergeni eñ az 600 vaqia bilemiz: Bohdan Zizanıñ yapqanı kibi yurtsever tattoolarnı toldurdılar, işğal memuriyetileriniñ üzerine mavi ve sarı boya töktiler veya işğal askeriy komissarlıqlarına molotof kokteylleri attılar. Ve bu insanlarnıñ er biri işğalciler tarafından qanunsız bir şekilde adalet ögüne çıqarıldı", — dep Taşeva qayd etti.
Bundan ğayrı, ruslar tarafından 2,5 senege maküm etilgen Qırım sakini Oleksandr Taraponnı hatırladı. O, RF SQniñ cenk cinayetleri aqqında malümat tarqata edi.
"Körünişe köre bu sadece kâğıtçıqlar. Faqat bir kişiniñ kâğıtlar sebebinden şiddetli rejimli bir müstemlekede apis cezasına maküm etilgeni şartında, bu kâğıtçıqlar küçlü bir qarşılıq oldı", — dep memur qayd etti.
"Sarı Şerit", "Açuvlı Mavka", "Qırım arbiy çağalaları" başta olmaq üzere bütün qarşılıq areketlerine ve teşkilâtlarına faal içtimaiy nazar noqtaları ve soñ derece zor şaraitte telükege baqmadan çalışmağa devam etmeleri sebebinden teşekkür bildirdi.
"Eminim ki, ukrain askerleri bizim topraqlarımıznı azat etecek vaqıt tamam bu insanlar bizim Silâlı Quvetlerimizni rastkelirler", — dep Taşeva qayd etti.
Telegram, Viber ve Facebookta Suspilne Qırım haberlerine abune oluñız