Qırım yanında Qara deñizdeki "Boyko qulleleri" Ukrainanıñ kontolı astındadır

. ГУР

Ukraina, "Boyko qulleleri"ni — 2014 senesinden berli işğal astında olğan ve Rusiye tarafından tolu miyaslı tecavuzdan berli arbiy maqsatnen qullanılğan Qırım yalısı yanında Qara deñizdeki burğu gaz ve yermay çıqarıcı platformalarını öz kontrolına qaytardı.

Telegramda Ukraina MNniñ İBİ bu aqqında haber berdi.

2022 senesinden berli Rusiye, vertolöt meydançıqları olaraq ve RLS vastalarını yerleştimek içün bu platformalarnı qullana edi.

"Ukraina MNniñ İBİnıñ bölükleriniñ quvetleri "Boyko qulleleri"ni Ukrainanıñ kontrolına qaytaruv yekâne operatsiyasını keçirdi, şu cümleden "Petro Hodovalets" ve "Ukraina" burğu platformaları, "Tavrıda" ve "Şivaş" SPBU kontrolımız astına qaytarıldı", - dep bildirildi.

Ukrain istihbaratınıñ bilgilerine köre, öz operatsiyası vaqtında mahsus quvetçiler qıymetli ğanimetlerni aldılar. Şu cümleden, yolbaşçılıq yapılmaz uçaq raketaları türlü vertolöt silâsını ve Qara deñizde gemilerniñ ketmelerini nezaret etken "Neva" RLSnı aldılar.

"Bu operatsiyanıñ basamaqlarından biri vaqtında gemilerdeki ukrain mahsus quvetçileri ve rus qırıcısı Su-30 arasında bir küreş oldı. Küreş neticesinde rus uçağı bozuldı ve keri çekilmege mecbur qaldı", - dep MNniñ İBİ qayd etti.

"Boyko qulleleri" aqqında ne bilemiz

  • "Boyko qulleleri" — Qırım yalısı yanında Qara deñizdeki burğu gaz ve yermay çıqarıcı platformalarıdır.
  • 2014 senesi Rusiye, Odesadan 100 km ve işğal etilgen Qırımdan 150 km`te burğu platformalarını zapt etti.
  • 2022 senesi bozarsan aynıñ 20-sinde Ukraina Silâlı Quvetleri, Qara deñizdeki "Boyko qulleleri"ne - "Petro Hodovalets" ve "Ukraina"ğa - raketa ücümini etip, ruslarnı Qara deñizde gaz çıqarma imkânından mamur ettiler.
  • Tolu miqyaslı tecavuzdan berli RF platformalarnı arbiy maqsatnen, şu cümleden radiotehnik istihbarat vastasınen suv üzerindeki vaziyetni nezaret etmek içün qullana edi.
  • "Bizim gazımızı hırsızlay ediler de, 2014 senesi Qırımnıñ işğali vaqtında Ukrainadan hırsızlanğan ediler de, ruslar anda öz REB stantsiyalarını yerleşe ediler. Ruslar olarnı öz gemileri içün qorçalav olaraq qullana ediler. Arqalarında gizley ediler, bizim mücize "Neptun"ımıznıñ olarnıñ sistemalarına ateş açamaması içün. Böylece oldı ki, o qullelerde bir kimse muvafaqiyetsiz tütün içti ve şimdi olar, ruslarnıñ tüşüngenleri maqsatnen qullanılmazlar", – dep 2022 senesi sabıq Ukraina mudafaa naziri Oleksiy Reznikov "Boyko qulleleri"ne raketa ücümini tefsir etti.

Telegram, Viber ve Facebookta Suspilne Qırım haberlerine abune oluñız