Avropa Şurasınıñ Parlament Assambleyasınıñ (AŞPA) maruzacısı, rusiye akimiyetini qanunsız olaraq tevqif etilgen jurnalist Amet Süleymanovnı azat etmege çağırdı. Onıñ ciddiy sağlıq meselelerine baqmadan Aqmescitteki 2. taqiqat izolâtorından rus müstemlekege etap etildi.
AŞPAnıñ ilânında bildirildi.
AŞPAnıñ uquq qorçalayıcılar ve malümatçılar meseleleri ve siyasiy mabüsler meseleleri baş maruzacıları Emanuelis Zİngeris (Litvaniya, EPP/CD) ve Sunna Evarsdottir (İslandiya, SOC) jurnalistniñ sağlığına dair raatsızlıq bildirdiler.
"Amet Süleymanovnıñ bir qaç hastalığı bar, şu cümleden ciddiy qapl hastalığını çeke. Birinciden ev tevqifi astında bulunsa da, 2023 senesi çiçek ayında o, taqiqat izolâtorına ketirildi. Süleymanovnıñ Rusiyeniñ uzaq yerindeki apishanege ketirilmesi ve müim tibbiy malzemelerge irişim berilmemesinen bağlı haberlerden soñ beyniñ ayatı telüke astında olmasınen pek raatsızlanamız", – dep bildirildi.
AŞPA, RFnı Süleymanovnı ev tevqifinden apishanege ketirüv aqqında qararını lâğu etmege, oña maqbul ilâçlarğa irişim temin etmege ve onı acele azat etmege çağırdı.
Amet Süleymanov aqqında ne bilemiz
- Süleymanov – 2014 senesi Rusiyeniñ Qırımnı qanunsız işğalinden soñ evlerniñ tintilmeleri ve qırımtatarlarnıñ tutulmaları aqqında haber bergen "Qırım birdemligi" içtimaiy jurnalistidir.
- 2020 senesi saban ayınıñ 11-inde işğal etilgen Qırımnıñ Bağçasaray şeerinde rus quvetçileri, yedi qırımtatarnıñ evlerini tinttiler, neticesinde olardan dörtü: Seitumer Seitumerov, Osman Seitumerov, Amet Süleymanov ve Rustem Seitmemetov tutuldı.
- 2021 senesi ekim ayında terror teşkilâtında iştirak etmek ve akimiyetni mecburen zapt etmege azırlamaqta qabaatlanğan o, 12 senege maküm etildi.
- 2023 senesi çiçek ayınıñ 5-ine qadar Süyelmanov, qalp hastalığı sebebinden, ev tevkifi astında buluna edi.
- Uquq qorçalayıcılar, bu ükümni qanuniy faaliyet içün intiqam olaraq adlandıraraq, ciddiy tarzda takbih ettiler.
Telegram, Viber ve Facebookta Suspilne Qırım haberlerine abune oluñız