Vaqtınca işğal etilgen Aqyar şeeriniñ hastahaneleri, Ukrainada cebede yaralanğan rus askerlerinen toludır.
Ukraina Prezidentiniñ Qırım MCdeki Vekilligi bu aqqında haber berdi.
"Açıq menbalar bildirdiler ki, Aqyar şeerindeki hastahaneler yaralanğan rus askerlerinen tolu. İşğalcilerni koridorlarda ve aşhanelerde bile yerleştireler", — dep bildirildi.
Bundan ğayrı, müessisede tafsilâtlıca añlattılar ki, Aqyardaki hastahanelerde tibbiy hızmetçiler de yetersiz.
Qırımnıñ vatandaş hastahanelerinde rus askerleri aqqında ne bilemiz
- Mayıs ayında Aqmescitteki Semaşko adına tibbiy merkez rus askerleriniñ ihtiyaclarına berildi, yerli sakinlerni ise tedaviylemege qabul etmeyler.
- "QırımSOS" uquq qorçalayıcı teşkilâtınıñ malümatına köre, işğal etilgen Qırımnıñ farqlı şeerleriniñ çoq hastahanesinde yaralanğan rus askerleri bulunalar. Tınç yaşağan hastalanğan sakinler içün tibbiy müessiselerde yer yoq.
- Klinik arbiy hastahane içün saban ayında vaqtınca işğal etilgen Aqyardaki vatandaş qan merkezlerinden rus tecavuzcıları, qan aldılar.
Telegram, Viber ve Facebookta Suspilne Qırım haberlerine abune oluñız