Saba saat 4ten Bağçasarayda ve Qırımnıñ Bağçasaray rayonında işğal quvetçileri, qırımtatarlarnıñ evlerini tinteler.
"Qırım birdemligi" bu aqqında haber berdi.
Belli oldı ki, şimdi Ruslan Asanov, Seydamet Mustafayev, Remzi Nemetulayev, Abdulmecit Seitumerov, Amethan Umerov ve Eldar Yakubovnıñ evlerini tinteler.
Saba saat 6:30ta işğalciler, eki faalcini Aqmescitke ketirdiler.
"Tamam sabadan berli qırımtatar musulmanlarınıñ evlerinde kütleviy tintüvlerniñ keçirilmesi aqqında malümat bermege başladıq. Şu anda altı faalciniñ evinde tintüvler devam eteler. Olar aqqında qısqaça añlatmağa tırıştım. Klassik repressiyalar ve faalcilik, nazar noqtası, dinni sıqıştırma stsenariyidir", — dep Facebookta uquq qorçalayıcı Mümine Saliyeva haber berdi.
UPD_1. Saba saat 7:50. Amethan Umerov ve Remzi Nimetulayevniñ evlerini taqiqat hareketlerini bittirdiler. Aqrabaları haber berdiler ki, olarnı Aqmescitteki işğal TFHniñ idaresine ketireler.
UPD_2. "Biz seslerni eşittik. Aqayım, bizim evimizin tintmege kelgenlerini ayttı. Olar "bu politsiya, qapını açıñız" dep bağırdılar. Aqayım özü qapını açtı, olar aynı anda bizim cep telefonlarımıznı almağa talep ettiler. Bundan soñ olar protokolnı oqudılar, anda 205.5. madde yazıldı, bir qaç soyadını oqudılar. Taqiqatçı Kostin Dmıtro Oleksiyovıç edi. Evimizin tinttiler, aqayımnıñ vesiqalarını — pasportın ve tatil vesiqalarını — da aldılar. Eki planşet ve aqayımnıñ cep telefonını alıp çıqardılar. Balalarnıñ virus hastalığı bar, olar çoq öksürdüler ve ağladılar. Üyken oğlumnıñ ateşi 39ğa arttı, biz acele yardım çağırdıq. Ayttılar ki, aqayımnı Aqmescitteki Frankağa ketirdiler", — dep Eldar Yakubovnıñ apayı Ayşe Yakubova tintüvden soñ tefsit etti.
UPD_3. Tintüvler saba saat 8ge qadar devam ete ediler. Mahsus hızmetlerniñ işçileri ve OMON askerleri evlerge aqrabaları, qomşuları ve içtimaiy jurnalistlerni yibermediler. Şaatlarnıñ sözlerine köre, insanların azbarğa bile yibermegenler.
Telegram, Viber ve Facebookta Suspilne Qırım haberlerine abune oluñız