İşğal etilgen Sevastopolda (AqyarRusiye imperiyası ve Şuralar Birligi tarafından Qırımnıñ meskün yerleriniñ adlarını deñiştirüv islâatından evelki adda) elektrik kesilüv müddetlerini qısqartacaqlarını söz bereler, amma sıñırlandıruv cedvelleri şimdilik quvette qala.
İşğalli şeer gubernatorı Mihail Razvojayev «ükümet»niñ boş aynıñ 2-ndeki oturışında bunı bildirdi.
Onıñ sözlerine köre, şimdi energetika sistemasında qoşma quvet temin etecek işler devam ete, bundan soñ elektrik kesilüv müddetlerini qısqartmağa planlaştıralar. Elektrik teminatında ictimaiy obyektlerge ve ayat temin etken obyektlerge birinci nevbet berilecek. Aynı zamanda Razvojayev bunıñ be vaqıt ola bilecegini açıqlamadı.
Bundan ğayrı, o, «Sevteploenergo» müessisesiniñ bütün qazanhanelerniñ işke tüşürilgeni ve ısıtuv yaşav fondına ve 427 ictimaiy obyektke, şu cümleden mekteplerge, balalar bağçalarına ve hastahanelerge berilgeni aqqında bildirdi. İşğalli idare ısıtuv teminatı sistemasında şimdilik qazalar qayd etilmegenini iddia ete.
Hatırlatamız ki, boş aynıñ 2-nde saba maalinde Sevastopolda (Aqyarda) «altı saatten eki saatke» vaqtınca elektrik sıñırlandıruv cedveli kirsetildi. İşğalli «Sevastopolenergo»nıñ bildirgenine köre, elektrik dört qullanıcı nevbetinden biriniñ içün eki saatke nevbetnen berile, qalğan üç nevbet elektriksiz qala. O, şeer tışında elektrik ağlarınıñ aşırı yüklenüvini yoq etmek ve energetik sistemasında qazalarnı toqtatmaq kerekligi ile añlattı.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
Bizni Google Haberlerinde oqumaq içün Suspilne Qırımnı saylanğan mevzularda saylañız