Qırım ressamı ve siyasiy mabüsi Boğdan Ziza, Burât Cumhuriyetindeki müstemlekede dört buçuq ay devamında ceza izolâtorından tışarıda tek 33 kün keçirdi.
Onıñ qız qardaşı Oleksandra Barkova Suspilne Qırımğa daimiy intizamiy cezalar, tutuv şaraitlerindeki sıñırlamalar ve ağasınıñ sağlığınıñ yamanlaşqanı aqqında añlattı. Onıñ sözlerine köre, izolâtorda ve kamera şaraitlerinde bulunmaq onıñ içün ahlâqiy basqı vastasıdır.
Qız qardaşınıñ sözlerine köre, müstemleke idaresi Boğdannı daimiy olaraq kiçkene bozuvlarda qabaatlay. Bunıñ sebebinden onı bir qaç kere ceza izolâtorından kameraga köçürdiler, soñra yañıdan izolâtorğa qaytardılar.
«Anda kiçkene bozuvlar daimiy, olar tamamen zorlap tartılğan. Bu, adetince ceza izolâtorına yollanılması kerek olğan şey degil. Menimce, olarğa sadece öz küçlügini köstermek isteyler», — dep añlattı Barkova.
O añlattı ki, ceza izolâtorında bulunuv şaraitleri ciddiy sıñırlamalarnı közde tuta.
«Ve anda mahsus şaraitler bar, çünki oña kün devamında iç bir şey yapmaq mümkün degil, yani ne mektüp yazmaq, ne de oqumaq. Künde sadece bir saat öz işleri ile oğraşmaq mümkün. Esasen sen sadece oturıp baqasıñ. Bu, menimce, ruhiy basqı vastasıdır», — dedi siyasiy mabüsniñ qız qardaşı.
Barkova añlattı ki, qardaşınen alâqa şimdi qıyınlaşqan. O oña telefon etip olmay, mektüplerni üçünci şahıslar vastasınen yetkize. Mektüpleşüv uzun devam ete: malümat eki-üç aftağa qadar yol keçe bile.
Qız qardaşınıñ sözlerine köre, Boğdan Zizanıñ büyrekleri ile meseleler peyda oldı, hronik hastalıqları kücleşti, şeni de teri ve tiş meseleleri bar. Barkova bunı, hususan, tutuv şaraitleri, sanitariyasızlıq ve tamamınen faydalı olmağan aş ile bağlay.
«Şimdi iklim deñişmesi sebebinden büyrekleri de endişelendirmege başladı. Onıñ hronik meseleleri bar, olar kücleşti — apisteki sanitariyasızlıq sebebinden teri meseleleri, tolu faydalı olmağan aş sebebinden tiş meseleleri», — dep añlattı Barkova.
Aynı zamanda, onıñ sözlerine köre, Boğdan mektüplerinde, özüni tutqanını ve alını nezaret etmege tırışqanını yaza. Qız qardaşı qayd etti ki, o, kritik alda degil, amma sağlıq meseleleri peyda olmağa devam ete.
Evel «Tribunal. Qırım epizodı» uquq qorçalayıcı teşebbüsi bildirgen edi ki, Boğdan Zizanı altı ayğa Burât Cumhuriyetindeki müstemlekede kamera türlü odağa (KTO) yolladılar. Leyhanıñ malümatına köre, bu müstemlekege kelgenden berli dört buçuq ay devamında o, ceza izolâtorından tışarıda umumen 33 kün keçirdi. Olarnıñ malümatına köre, KTOdaki şaraitler apis şaraitlerinden çoq farq etmey.
Uquq qorçalayıcılar qayd eteler ki, böyle tecribe Rusiye tenbiye sistemasında keñ yayılğan: terrorcı yönelişli cinayetlerde qabaatlanğan mabüslerni formal sebeplerge köre daimiy ceza izolâtorlarına yerleştireler, intizamiy cezalar toplanğan soñ ise KTOğa ya da ağır tutuv şaraitlerine köçüreler.
Oleksandra Barkova ağasınıñ dört buçuq ay devamında ceza izolâtorından tışarıda umumen 33 kün keçirgeni aqqındaki malümatnı tasdıqladı.
«Tamamen doğru. Menimce, açıq aytsam, atta daa az», — dedi o.
Aynı zamanda qız qardaşı qayd etti ki, uquq qorçalayıcılar bildirgen, ağasınıñ ceza izolâtorına yañıdan yerleştirilgeni aqqındaki malümatnıñ tasdıqlaması yoq.
Boğdan Ziza aqqında ne bilemiz
2022 senesi mayıs ayınıñ 20. künü qırım ressamı ve faalcisi Boğdan Zizağa qarşı "terror aktını yapmağa ıntıluvı" aqqında cinaiy dava açıldı. Onı şübeleyler ki, mayıs ayınıñ 16. künü işğalli şeer memuriyetiniñ binasını boyanen boyaladı ve onı yaqmağa tırışqan.
Bozarğan aynıñ 6. künü Rostov-na-Donudaki Cenübiy bölge arbiy makemesi qırım ressamı ve faalcisi Boğdan Zizanı 15 senege maküm etti.
Bozarğan aynıñ 10. künü Ziza açlıq ilân etti. O, rusiye vatadaşlığından marum etmesini ve ukrain siyasiy mabüslerini azat etmesini talap etti. Bozarğan aynıñ 27. künü açlıq çekmege bitirdi.
Ukrain repçisi Artem Loik, 15 senege maküm etilgen ressam ve faalcini destek etmek içün video çıqardı, çünki Ziza soñ sözüni aytqanda repçiniñ "Krıla" ("Qanatlar" - terciman) yırından sözlerni qullandı.
Qırımda apis etilgen Kezlevli ressam Boğdan Zizanıñ şerefine ukrain ressamları trenni resimlernen yaraştırdılar.
2023 senesi berim ayınıñ 27. künü Vlasıha şeerindeki Arbiy apellâtsiya makemesi, qırım ressamınıñ 15 senelik ükümini deñiştirmeyip qaldı.
Boş aynıñ 12. künü siyasiy mabüsniñ mektüp dostu ondan mektüp alıp haber berdi ki, Boğdan Ziza Perm şeeriniñ 29. müstemlekesine etap etile. Bundan evel arqabaları, etap devrinde qayda bulunğanını bilmegen ediler.
Hizb ut-Tahrir, islâm siyasiy fırqasıdır. 2003 senesi Rusiyede o, terrorcı bir teşkilât olaraq tanındı, oña bağlı olğan insanlarnı ise taqip etmege başladılar. İştirakçileri, «qanunlarğa qarşı faaliyet»te ve böyle degen «cian hilâfeti»ni yaratmağa ıntılmağa qabaatlanalar. 2014 senesi Qırım işğal etilgen soñ işğalcilerniñ qanunları zapt etilgen Qırımda da qullanılmağa başlandı. Qırımlı musulmanlarnı da Hizb ut-Tahrirge bağlı olmaqta qabaatlamağa başladılar, böylece yarımadanıñ işğaline qarşı olğanı sebebinden qırımtatarlarğa basım arttı.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
Bizni Google Haberlerinde oqumaq içün Suspilne Qırımnı saylanğan mevzularda saylañız