İşğal etilgen Qırımda «Ğvardiyske» ava limanında ruslar «Geran» türlü dronlarnı saqlamaq içün astyapını kenişleteler. Uydu közetüvi, topraq damları tarafından qorçalanğan 20-den ziyade küçük sığınaq ve 40-qa yaqın kiçik sığınaqnıñ qurulğanını qayd etti.
Suspilne Qırım Ukrayina havfsızlıq ve işbirlik merkeziniñ baş analitikacısı Anton Zemlânıyğa bunıñ Ukrayina içün ne telükege yol aça bilgenini soradı.
«Bu, arbiy ava limanınıñ astyapısında qurulğan Rusiye dron limanıdır. Aslında — arbiy ava limanı, anbar, hızmet bazası ve farqlı çeşit dronlar içün uçuruv meydançığı, klassik ve reaktiv "Geran"lar, "Gerbera" ve "Parodiya"lar (imitator-dron, ücüm etici, ve ilâhre) vazifelerini birleştirgen aviatsiya-insansız ameliyat noqtası. Bu dron limanından esas uçuruvlar mobil uçuruv maşnaları vastasınen, yani mahsus donatılğan maşinalar vastasınen yapıla. Daa evel haber etilgenine köre, ruslar, dronlarnı uçurmaq içün bir qaç stantsiya quralar. Buña baqmadan, büyük ihtimalnen, "Geran" reaktiv dronlarını uçurmaq içün aynen mobil uçuruv [maşinalarını] qullanmağa devam eteler», — dep añlattı arbiy mütehassıs.
Onıñ malümatına köre, Rusiye tek dronlarnıñ istisalını degil de, olarnı saqlamaq, azırlamaq ve uçurmaq içün obyektlerniñ ağını kenişlete. Uçuruv maşinalarınıñ sayısı bir ücümge qaç dron celp etilecegini belgiley, anbarlarnıñ ve saqlav yerleriniñ miqdarı ise, kütleviy ücümler içün evelden ne qadar yedek toplanıla bilecegini belgiley.
«Böyleliknen, bu astyapı inkişafı ava ücümleriniñ miqyasını arttırmaq içün şartlarnı yarata. Aynı zamanda, bir qaç büyük obyekt yerine onlarca ve yüzlernen küçük anbar ve garaj yerleştirilmesinen, belki de, diqqat ayırıla», — dedi o.
Mütehassısnıñ aytqanına köre, ruslarnıñ böyle yanaşuvı, toplanğan dronlarnı yoq etmege qıyınlaştıra, çünki bir çoq ayrı maqsatqa ücüm etmek kerek.
«İhtimal etilgen esap — Ukrayinağa er bir obyektte nisbeten az sayıda dronnı yoq etmek içün daa çoq silâ sarf etmege mecbur etmek. Dronlarnıñ sayısı ve saqlap qalması aqqında aytmaq bile qıyın. Bundan da ğayrı, böyle qıymet kesmek içün tek dronlarnı saqlamaq içün garajlarnıñ sayısını ve olarnıñ sıñırlarını degil de, ruslar anda kerçekten qaç dronnı yerleştirecegini de añlamaq kerekler», — dep añlattı Zemlânıy.
Soñki eki ay içinde Ukrayina Mudafaa quvetleri «Ğvardiyske» ava limanına eñ az 6 kere ücüm etti, dep qayd ete Anton Zemlânıy. Dnipro Osintniñ osinteraçıq menbağa esaslanğan istihbarat mütehassıslarıleri yayınlağan soñki uydu resimlerinde, evelki zarar körgenlerniñ izleri qayd etildi.
«Ücümler meydançıqnıñ uzun müddetke toqtatılmasınıñ sebebi olmadı. Resmiy malümatlarda Rusiye ücüm etici UUAuçucısız uçaq aletilerini uçuruv yönelişleri arasında «Ğvardiyske» adı keçe. Bu, ücümniñ tesirini red etmey, amma olarnıñ neticeleri çoqusı allarda yerli ve muvaqqat olğanını köstere — yedeklerniñ yoq etilmesi, binalarnıñ zararlanması ve azırlıq tsikliniñ bozulması. Aynı zamanda bu kibi tesir endi muvafaqiyetli sayıla bile, çünki bu, ğaliba, cenübiy ve merkeziy Ukrayinada bir sıra duşman ücüm etici dronlarınıñ ameliyatlarını bozdı», — dey o.
Mütehassısnıñ aytqanına köre, Rusiyeniñ Qırımdaki arbiy imkânlarınıñ kenişletilmesi Odesa, Mıkolayiv, Herson ve Zaporijjâ vilâyetleri içün telüke doğura.
«Qırımnıñ merkeziy qısmından uçuruv bu bölgelerge yolnıñ başlanğıç qısmını qısqarta ve, bunıñnen beraber, teşkerüv, haberdar etüv ve qarşılav vaqtını qısqarta. Aynı zamanda "Geran"larnıñ uzaqlığı olarnı daa teren yerge — Kıyiv, Dnipropetrovsk, Poltava ve diger vilâyetlerge qarşı yöneltmege imkân bere. Böyle bir merkezniñ inkişafı Rusiye uçuruv sistemasınıñ stabilligini de arttıra. Bir angarnıñ ya da uçuruv meydançığınıñ zararlanması ameliyatlarnı toqtatmay. Dronlarnı ve maşina cihazlarını sığınaqlar arasında taşıp, ava limanından çıqarıp, bir qaç yerden uçurmaq mümkün», — dedi Zemlânıy.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
Bizni Google Haberlerinde oqumaq içün Suspilne Qırımnı saylanğan mevzularda saylañız