İşğal etilgen Qırımda magistral ağları bozulğanı sebebinden elektrik energiyasınıñ qullanuvı sıñırlandı. Sevastopolda (AqyarRusiye imperiyası ve Şuralar Birligi tarafından Qırımnıñ meskün yerleriniñ adlarını deñiştirüv islâatından evelki adda) elektrikni «6 saatten 2 saatke» cedveline köre bereler, işğalli akimiyet Yalta sakinlerini ise elektrik ağlarını aşırı yüklememege çağırdı.
Orta küz ayınıñ 17-nde «Krımenergo» işğalli agentligi öz saytında yarımada energetik sistemasınıñ küçü eksilgenini bildirdi.
«Elektrik ağlarında olğan bozmalar neticesinde ağlarnıñ keçimi eksildi. Qırım Cumhuriyetiniñ bütün toprağında elektrik energiyasınıñ qullanuvı sıñırlana. Bu mecburiy, elektrik ağlarınıñ aşırı yüklenmesini yoq etmek içün, elektrik ağında qazalar olmamaq içün kerek olğan bir tedbirdir. Elektrik energiyasınıñ berilmesi elektrik ağınıñ imkânlarına köre yapıla. Elektrik energiyasınıñ yedek sheması qullanıla», — dep qayd etildi haberde.
İşğal etilgen Sevastopolda (Aqyarda) «6 saatten 2 saatke» cedveli dört nevbette çalışacaq: er eki saat elektrik teminatı dört nevbetten birine nevbetnen berilecek. Bu vaqıt devamında diger üç sıra elektriksiz qala.
Bundan ğayrı, saba şeerde trolleybuslarnıñ işi toqtatıldı. Olarnıñ yerine avtobuslar yolğa çıqtı.
Yalta sakinleri de elektrik sıñırlavı aqqında haberdar etildi. İşğalciler olarnı elektrik ağlarını aşırı yüklememege çağıralar.
Hatırlatamız ki, orta küz ayınıñ 24-nde gece işğal etilgen Qırımda vaqtınca elektrik söndürildi. İşğalli akimiyet yarımadanıñ tışındaki elektrik ağlarında qaza olğanını bildirdi. Rusiye Federatsiyasınıñ Krasnodar ülkesinde 500/220 kV «Taman» elektrik ast stantsiyasında yanğın oldı. Bundan da ğayrı, saba maalinde yarımadadan internet areketi aman-aman yoq, yarımadanıñ bir qısmı alâ daa elektriksiz qala.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
Bizni Google Haberlerinde oqumaq içün Suspilne Qırımnı saylanğan mevzularda saylañız