İşğal altındaki Aqyarda ekim ayınıñ 24-nde gece Qırım tışında yüz bergen qaza neticesinde saat 02:00-da elektrik energiyası ğayrıdan tiklendi. Sabağa qadar kene de basqı oldı. İşğalci akimiyet saat 12:00-dan itibaren eki nevbet içün «3 — 3» ışıq söndürüv cedvelini kirsete. Sanayı ve ticaret merkezleri içün sıñırlavlar da olacaq.
Ekim ayınıñ 24-nde aqşam Telegramda şeer «gubernatorı» Mıhaylo Razvojayev bu aqqında bildirdi.
Sanayı obyektleri ve alış-veriş merkezleriniñ elektrik teminlevini sıñırlamaq ve ağdaki yükni eksiltmek içün başqa imkânlarnı baqmaq emir etildi. Azat etilgen küçlerni ilk evelâ mesken evlerge yöneltmek kerek. Aynı zamanda, energetik sistemanıñ tehnikiy imkânları, bütün sıñırlavlar tek sanayı obyektleri ve ticaret merkezleri esabına lâğu etilecegini kefil etmege imkân bermey, — o, dedi.
Razvojayevniñ aytqanına köre, cedvelge köre, bu nevbetlerniñ bütün qullanıcılarınıñ ışığı söndürilmeycek.
«Şimdilik, tışqı sıñırlavlar altında bulunğan adreslerni evelden belgilemek mümkün degil: er şey şimdiki yükke ve energiya sistemasınıñ vaziyetine bağlıdır», - o, dep qoştı.
Hatırlatamız, ekim ayınıñ 24-nde gece işğal etilgen Qırımda vaqtınca elektrikler söndürildi. İşğalci akimiyet yarımadanıñ tışındaki elektrik ağlarında qaza olğanını bildirdi. Rusiye Federatsiyasınıñ Krasnodar ülkesinde 500/220 kV «Taman» elektrik stantsiyasında yanğın yüz bergenini uydudan alınğan malümat tasdiqladı. Bundan ğayrı, yarımadadan internet-trafikniñ aman-aman sıfırı qayd etildi.
Ekim ayınıñ 24-nde saba Qırımnıñ işğalci yolbaşçısı Sergey Aksönov yarımadada suv ve yarıq sıñırlarını kirsetti. Aynı vaqıtta Aqyarnıñ büyük qısmı aqşamğa qadar elektrik energiyasını qaytarmağa planlaştırıla edi.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
Bizni Google Haberlerinde oqumaq içün Suspilne Qırımnı saylanğan mevzularda saylañız