Qırım işğali başlağanından berli Rusiye 560 insannı siyasiy sebepli cinaiy davalar çerçivesinde taqip etti, olardan 316 — qırımtatar halqınıñ vekilleri.
Qırımtatar Resurs Merkezi bu aqqında bildire.
2014 senesi Qırım işğali vaqtından berli Rusiye akimiyeti farqlı fikir bildirgenlerni bastırmaq içün taqip ve qorquzuv siyasetini alıp bara. Bu müddet devamında 560 siyasiy mabüs ve cinaiy «iş» boyunca taqip etilgen şahıs qayd etildi, olardan 316 — qırımtatar halqınıñ vekilleri. Çoqusı allarda bu insanlar işğalge qarşı çıqqan, insan aqlarını qorçalağan ya da faal olğan insanlardır, dep aytıla haberde.
Uquq qoruyıcılarnıñ qayd etkenine köre, siyasiy repressiyalardan ğayrı, Rusiye qırımtatarlarnıñ menligini yoq etmek ve zorbalıqnen assimilâtsiya etmek içün zorbalıq usullarını qullana, şu cümleden Meclisniñ faaliyetini yasaq etmek, halq liderlerini taqip etmek ve mustaqil matbuat vastalarını qapatmaq.
İşkence, adaletsiz mahkeme ve insaniyetsizlik şaraitlerinde tutuvlar, Qırımdaki başqa fikirde olğanlarğa qarşı küreşte Rusiye akimiyetiniñ adiy bir aleti oldı. 2022 senesi kiçik aynıñ 24-nde Rusiyeniñ Ukrayinağa büyük miqyaslı istilâsı, tek Ukrayina devletine qarşı degil de, barışıqlı vatandaşlarğa qarşı da devletniñ zorbalıq ve tecavuz siyasetiniñ daa bir ifadesi oldı. İşğal insan aqlarınıñ kütleviy bozuluvı ile devam ete: öldürüvler, işkence, vatandaşlarnıñ hırsızlanması ve qırımtatarlarnıñ Rusiye ordusına mecburen celp etilmesi, — dep QRMde qayd etteler.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
Bizni Google Haberlerinde oqumaq içün Suspilne Qırımnı saylanğan mevzularda saylañız