Simferopolda «polis» şeerniñ video nezaretine tam irişimni aldı — faalci

İşğal etilgen Qırımnıñ Simferopol (AqmescitRusiye imperiyası ve Şuralar Birligi tarafından Qırımnıñ meskün yerleriniñ adlarını deñiştirüv islâatından evelki ad) polis şeerniñ video nezareti sistemasına tam irişimni aldı, bu ise Ukrayinağa qoltutqan gizli teşkilâtnıñ faaliyetini qıyınlaştırdı, amma o, çalışmağa devam ete.

İlk küz ayınıñ 24-nde «Qırım.Aqiqat» saifesinde Qırımnıñ işğalden azat etilmesi içün #LiberateCrimea halqara kampaniyasınıñ faalcisi bunı bildirdi.

Onıñ aytqanına köre, kameralarnıñ tarqalğan ağı sayesinde, narazılıq aktsiyaları, hususan, levhalar ya da timsaller tarqatıluvı, iştirakçiler içün daa telükeli oldı. İşğalcige qarşılıq köstergen areketler arasında «Açuvlı Mavka», «Ateş» ve «Sarı Şerit» areketlerini añdı.

«Cemiyetniñ körüngen faaliyeti eksildi, lâkin muqavemet gruppalarınıñ gizli faaliyeti arta. Qırımdaki Ukrayina tarafdarı faalcilerniñ apiske alınması bizni qorquzmay, amma bar olğanımıznı ve çoq olğanımıznı köstere», — dep qayd etti faalci.

Daa evel «Sputnik v Krımu» rusiye teşviqat radiosınıñ canlı yayınında işğalli Simferopol (Aqmescit) memuriyetiniñ «başınıñ muavini» Oleksandr Semençenko, «polis» şeerniñ bütün birleştirilgen video nezareti sistemasına kirip, er kün «kerekli adiseler»ni baqqanını bildirdi.

İlk küz ayınıñ başında «ATEŞ» arbiy-partizan areketi, onıñ agentleri işğal etilgen Simferopoldaki (Aqmescitteki) «Fiolent» zavodına kirgenlerini bildirdi. Müessiseniñ malümatına köre, müessise Rusiye Federatsiyasınıñ arbiy-sanayı kompleksi içün çalışa. Mında, hususan, gemilerniñ avtomatika sistemaları, arbiy aviatsiya içün elektronika ve zırhlı tehnikanıñ qısımları işlep çıqarıla.

Mayıs ayında The Kyiv Independent gazetası, «Sarı şerit» ve «Açuvlı Mavka» qarşılıq areketleriniñ faaliyetine dair tahqiqatnı derc etti. Matbuatta, hususan, olarnıñ maliye etilüvi ve işğal etilgen topraqlarda agentlerniñ telükesizligi ile bağlı meseleler muzakere etile edi. Suspilne Qırım jurnalistleri «Sarı şerit» içün vazifelerni eda etken gençnen, em de raqam telükesizligi mütehassısları, uquq qorçalayıcılar ve tahqiqatnıñ müelliflerinden biri ile subetleştiler. Bundan da ğayrı, muarririyet areketniñ vekillerine muracaat etti. Tafsilâtlıca — bizim maqalemizde oquñız.

Читати ще