Qırımda Yevpatoriya (Saq) rayonınıñ 27 yaşındaki sakini işğalciler tarafından qanunsız şekilde tutuldı. Onı «terrorizmni açıq şekilde aqlağanı»nda qabaatladılar. Erkek 7 yılğa qadar apis cezasını ala bile.
İlk küz ayınıñ 14-nde TASS Rusiye devlet agentligi bu aqqında haber etti.
«1999 senesi doğğan Saq rayonınıñ sakini RF Yuqarı mahkemesiniñ terroristik teşkilât olaraq tanılğan ukrayin arbiy milletçilik birleşmesiniñ faaliyetine qoltutqanını açıqtan bildirdi. Oña qarşı Rusiye Ceza qanunnamesiniñ 205.2 maddesiniñ 2-nci qısmına köre cinaiy dava açıldı (terror faaliyetini kerçekleştirmek içün açıq çağıruvlar, terrorizmni açıq aqlav ya da terrorizm teşviqatı)», — dep qayd etildi haberde.
İşğalli «Kıyiv rayon mahkemesi»nde oña tevqif şeklinde tedbir alındı. Maddege köre, yedi yılğa qadar apis cezası berile bile.
Ruslar tutulğan adamnıñ adını aytmaylar. Qanunsız apiske alınğanınıñ videosını RİA «Novosti Krım»nıñ Telegramında derc ettiler. Anda vışıvanka kiygen adam edi. «Sorğu» vaqtında o, tanışları arasında «Azovğa qoltutqanı»nı bildirgenini tanıdı.
Bundan da ğayrı, işğalli «FSB» videoda «Azov» polkunen sıq-sıq bağlı olğan bir adamnıñ bedeni üzerinde olğan tatularnıñ resimlerini derc ete. Bu — «Millet ğayesi» (ꑭ işareti) — «I» ve «N» (eski ukrayin yazısı) arifleriniñ bir-birine qoyulğan monogramması, «Qara küneş» — 2014 senesinden başlap ukrayin milletçileri ve arbiy hızmetçileri arasında populâr oldı (ayrıca, «Azov» polkunıñ birinci tamğasında qullanılğanı içün).
Hatırlatamız ki, 2022 senesi arman ayınıñ 2-nde RF Yuqarı mahkemesi «Azov» polkunı «terroristik teşkilât» olaraq resmen tanıdı.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
Bizni Google Haberlerinde oqumaq içün Suspilne Qırımnı saylanğan mevzularda saylañız