2026 senesi arman ayınıñ 10-nda işğal etilgen Qırımda qırımtatar çalğıcısı, perkussiya ustası ve zemaneviy qırımtatar muzıka medeniyetiniñ temsilcisi Rustem Bari 62 yaşında vefat etti.
Qırımtatar Milliy Meclisiniñ Reisi Refat Çubarov bunı bildirdi.
Çubarovnıñ aytqanına köre, Rustem Bariniñ ayatı qırımtatar ananelerini zemaneviy şekiller ve caz improvizatsiyasınen birleştirgen muzıkanen bağlı edi.
«Onıñ icra ustalığı, ritm duyğusı ve oyuncılığı qırımtatar ve ukrayin muzıka sanalarınıñ müim qısmı oldı», — dep yazdı Çubarov.
Rustem Bari, Enver İsmailov ve diger meşur icracılarnen beraber zemaneviy qırımtatar etnocazınıñ peyda oluvında iştirak etti. Bu yöneliş qırımtatar muzıka medeniyetini Qırım tışında populârlaştırmağa imkân berdi.
Çubarovnıñ qayd etkenine köre, çalğıcınıñ ölümi onıñ qorantası, dostları, zenaatdaşları ve bütün qırımtatar halqı içün ğayıp ola.
O, öz adından ve Qırımtatar Milliy Meclisi adından Rustem Bariniñ tuvğanları ve yaqınlarına taziyelerini bildirdi.
«Onıñ istidatı, icadiy esası ve qırımtatar medeniyetiniñ saqlanuvı ve inkişafına qoşqan emiyetli isse Qırım ve qırımtatar halqınıñ tarihında ebediyen qalacaq», — dep yazdı Çubarov.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
Bizni Google Haberlerinde oqumaq içün Suspilne Qırımnı saylanğan mevzularda saylañız