İşğalli Qırım akimiyet insanlarnı Ukraiynanen işbirlik yapqanlarında qabaatlap tuttı. Tutulğanlarnıñ sayısı bildirilmey.
Qırımdaki işğalli FSBe atfı etip, RİA "Novosti Krım" bu aqqında haber etti.
Rusiye mahsus hızmetiniñ malümatına köre, yaqalanğanlar "çetel kuratorları"nen öz başına bağ tuttılar.
"Olarnı cenk areketleri zonasında Rusiye arbiy hızmetçileri aqqında malümat toplağanlarında, AMSava mudafaası sisteması vastalarınıñ yerleştirüvinde, ukrayin ücümleriniñ aqibetlerini qayd etkenlerinde ve Rusiye Mudafaa nazirliginiñ bölükleri yerleşken yerler aqqında malümat bergenlerinde qabaatlaylar", — dep qayd etildi haberde.
Hatırlatamız ki, ilk yaz ayında işğal etilgen Qırımda "Ukrayina mahsus hızmetlerine "LNR" ve Qırımnıñ ilmiy ve tasil müessiseleriniñ faaliyeti aqqında malümat bergen" 58 yaşındaki Luğansk vilâyetiniñ sakini tutuldı.
Oña qarşı "devlet hainligi" içün cinaiy dava açıldı. Rusiye FSBsiniñ Cemaat bağları merkezi bu aqqında haber etti.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız