İşğal etilgen Qırımda benzin satıluvına sıñırlavlar devam ete. Yarımadanıñ meskün yerlerinde ise yarıq söndüreler.
Aqyarda (Sevastopolda) 28,06 litr benzinni tek QR-kodlar boyunca satalar, şeerniñ işğalci gubernatorı Mihail Razvojayev bildirdi.
"Yarın dizelni toldurmaq mümkün olacaq, amma tek naqliyat vastalarınıñ qayd etilüvi aqqında şeadetnameniñ aslını köstermek şartınen. Vesiqalardaki araba nomeri, berilgen QR-kodta qayd etilgen malümatnen uyğun kelmek kerek", — dep haberde aytıla.
Şeerniñ elektrik teminlevi aqqında malümatnı o derc etmey. Aluştada bugün ışıq söndürüv başlanacaq, dep şeerniñ işğalci yolbaşçısı Galina Ogneva bildirdi.
Hatırlatamız, işğal etilgen Qırımda benzin qıtlığı sebebinden şeerlerara naqliyat 80%-ğa qısqartıldı. FortPost neşiri, Aqyar naqliyat şirketleri birliginiñ işğalci yolbaşçısı Viktor Rikovnıñ malümatına esaslanıp bu aqqında bildire.
Onıñ aytqanına köre, şimdiki vaqıtta naqliyat şirketleri kerekli olğan yakıtnıñ tek dörtte bir qısmını alalar. Şirketlerniñ bir qısmı öz azbarında çalışmaqta.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız