Ukrayina havfsızlıq hızmeti işğal etilgen Keriçte muvafaqiyetli mahsus tedbir keçirilgenini bildirdi, onıñ devamında uçucısız uçaq aletleri eki Rusiye arbiy gemisini, paromnı ve S-400 raketa kompleksiniñ elementlerini urdı. Müessise malümatına köre, ücüm neticesinde gemilerde yanğın çıqtı.
İlk yaz ayınıñ 26-nda Ukrayina havfsızlıq hızmeti bunı bildirdi.
"Ukrayina prezidenti Volodımır Zelenskıynıñ Rusiye Federatsiyasına tesir etüv 40 künlik operatsiyası çerçivesinde qoyulğan vazifelerni yerine ketirerek, UHHniñ "Alfa" askerleri vaqtınca işğal etilgen Keriçte "Zatok" gemi qurucılığı zavodınıñ toprağında bulunğan arbiy teminat gemilerine muvafaqiyetli ücümler etti. Bundan ğayrı, Keriç boğazı rayonında Rusiye ordusınıñ ava mudafaasınıñ vastaları zarar kördi", — dep aytıla haberde.
UHH, mahsus tedbirler vaqtında dronlarnıñ 15310 leyhasınıñ "Volga" ve "Vâtka" kabel gemilerine, em de 96% azırlıqta olğan "Petropavlovsk" yük-yolcu paromına ücüm etkenini bildirdi. O, olarnı urıp, büyük yanğın çıqttı.
"Volga" ve "Vâtka" Rusiye Mudafaa nazirligi içün quruldı. Olarnıñ vazifesi — "Harmoniya" gidroakustik közetüv sistemasınıñ suv astı arbiy istihbaratı içün qullanılması. Bundan da ğayrı, olar gemiler, suvastı borular, kabeller ve diger kritik astyapınıñ obyektlerine zarar ketirmek içün kontakt olmağan minalar qoya bileler. Bu gemilerniñ fiyatı yüz millionlarnen dollarnı teşkil ete", — dep añlattı UHH.
Bundan da ğayrı, UHHniñ malümatına köre, dronlar Keriç boğazınıñ rayonını qorçalağan S-400 zenit raketa kompleksiniñ silâsını ve radiolokatsiya stantsiyasını urdı.
"UHHniñ vaqtınca işğal etilgen Qırımda Rusiye arbiy astyapısınıñ bozuluvınen bağlı sistematik işi duşmanğa yarımadanı logistika ve arbiy merkez olaraq qullanmaq imkânını bermey. AMS vastalarınıñ yoq etilmesi yañı yüksek dereceli ücümler içün yol aça, gemilerniñ ve liman astyapısınıñ bozuluvı ise işğalcilerniñ öz taqımlarını temin etmek qabiliyetini boza", — dep qoştı müessise.
Ukrayina mudafaa naziriniñ cebede UUAni qullanuvınıñ arttırılması meseleleri mesleatçısı Serğiy Sternenko bildirdi ki, işğal etilgen Keriçte Mudafaa quvetleriniñ ücümleri neticesinde Rusiye AMSnıñ yerleşmesi ve ava limanı rayonında yanğın çıqtı.
Bundan da ğayrı, bu gece işğal etilgen Keriç, Yañı Qapu (Krasnoperekopsk), Perekops (OrRusiye imperiyası ve Şuralar Birligi tarafından Qırımnıñ meskün yerleriniñ adlarını deñiştirüv islâatından evelki ad), Yevpatoriya (KezlevRusiye imperiyası ve Şuralar Birligi tarafından Qırımnıñ meskün yerleriniñ adlarını deñiştirüv islâatından evelki ad) rayonlarında patlavlar aqqında "Qırım yeli" Telegram kanalı haber ete.
Yoldaş resimlerine köre, Keriçte ruslarnıñ ava mudafaası obyektleri yerleştirilgen eski ava limanında yanğın çıqtı.
İlk yaz ayınıñ 25-nden 26-na keçer gecesi saat 23:50-den 06:14-ke qadar işğalciler Keriç boğazından qanunsız keçitmi — Qırım köprüni — qapattılar.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız