İlk yaz ayınıñ 26-nda Kıyivniñ merkezinde Qırımtatar milliy bayrağı kününe bağışlanğan tantanalı tedbirler keçirildi. Meclis, devlet müessiseleri ve cemiyet vekilleri Qırımnıñ işğalden azat etilmesi oğrunda küreşte ukrayin ve qırımtatar halqlarınıñ birligini ve Kreml siyasiy mabüslerine qol tutuvını qayd ettiler.
Adise yerinden Suspilne Qırım mühbiri bunı bildirdi.
Qırımtatar Milliy Meclisiniñ reisi Refat Çubarov emin ki, Qırım işğalden azat etilecek ve anda kene Ukrayina ve qırımtatar bayraqları dalğalanacaq.
"Bugün qırımtatar milliy bayrağı qırımtatarlarnıñ öz toprağı olğan Qırımğa sadıqlığını temsil ete, Qırımnıñ Rusiye işğalinden azat etilmesi ve Qırım yarımadasında Ukrayinanıñ devlet suverenitetiniñ ğayrıdan tiklenmesi içün ukrayin ve qırımtatar halqlarınıñ umumiy küreşini temsil ete. Rusiye apishaneleriniñ inanılmaz derecede ağır ve insaniyetsiz şaraitinde dayanğan Qırım siyasiy mabüslerine qol tutuv sözlerimiznen muracaat etemiz. Arbiy hızmetçilerniñ cesürligi ve fedakârlığı içün minnetdarlığımıznı bildiremiz. Eminim ki, eñ yaqın kelecekte Rusiyeden azat etilgen Qırımda Ukrayina ve qırımtatar bayrağı kene ve ebediyen dalğalanacaq", — dep qayd etti Çubarov.
"Qırımtatar resurs merkezi"niñ reisi Eskender Bariyev çıqışta bulunıp, Kıyivde qırımtatar bayrağını kötermege kelgen er keske teşekkürler bildirdi.
"Bugün bütün Ukrayinada ve bir çoq memlekette Qırımtatar milliy bayrağı kününe bağışlanğan tantanalı merasimler keçirile. Öz ürmetini diplomatlar, siyasetçiler, cemaat erbapları, ukraiyn halqı köstere. Bugün qırımtatar halqınıñ bayrağını ğururnen kötermek, taqipke baqmadan öz menligini saqlağan işğal etilgen Qırımda vatandaşlarımızğa qol tutmaq ve Ukrayina azatlığı, adalet ve topraq bütünliginiñ ğayrıdan tiklenmesi oğrunda küreşte birdemligimizni isbatlamaq içün toplaştıq", — dep bildirdi o.
Prezidentniñ Qırımdaki daimiy temsilcisiniñ muavini Denıs Çıstikov çıqışta bulunıp, işğal etilgen yarımadada qırımtatarlar köstergen qarşılıqqa diqqat çekti ve qırımtatar halqınıñ temsilcileri olğan 160-tan ziyade siyasiy mabüsni añdı.
"Yazıq ki, şimdilik qırımtatar bayrağı 2014 senesinden berli işğal etilgen Qırımda qarşılıqnıñ timsali ola. Bugün Qırımda 300-den ziyade siyasiy mabüs bar, olardan 160-dan ziyadesi qırımtatar halqınıñ vekilleri ola. Qayd etmek kerek ki, Qırımda narazılıqnı tek erkekler degil, qırımtatar halqınıñ qadınları da köstere. Ve o, çoqlaşa. Ne yazıq ki, ana-babası apishanede yatqan qorantalar bar, balaları ise başqa qorantalar tarafından östürile", — dp ayttı memur.
Ukrayina Qavmiy siyaset ve vicdan serbestligi devlet hızmetiniñ yolbaşçısınıñ muavini İğor Lossovskıy Ukrayina Mudafaa quvetleri terkibinde Rusiyege qarşı cenkke qoşulğan bütün qırımtatarlarğa teşekkürler bildirdi ve Ukrayina olarnıñ aqlarını qorçalamaq içün çalışqanını qoştı.
"Qırımtatarlar Ukrayinanıñ, cemiyetimizniñ, ayatımıznıñ ayırılmaz parçasıdır. Ukrayinada eñ faal milliy cemiyetlerden biri. Qırımtatarlar Ukrayina Silâlı quvetlerine qoşulıp, bugünki künde Ukrayinanıñ serbestligi, mustaqilligi ve bütünligini qorçalay. Teessüf ki, bir çoqları bu uruşlarda elâk oldı. Bugün biz tamır halqları qanunınıñ amelge keçirilmesi, Meclisnen beraber bu qanunğa uquqiy esasnıñ teşkil etilmesi üzerinde çalışamız", — dep ayttı memur.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız