Qırımda ana-babalarğa qırımtatar tilinde dersler açmağa yardım etken sinif.ru leyhasınıñ yañı versiyası taqdim etildi. Platformanıñ yañı elementi, balaları içün milliy tasilnen meraqlanğan qorantalarnı birleştirmek içün azırlanğan mektep interaktiv haritası oldı.
Qırımtatar resurs merkezi bunı bildirdi.
Esas yañılıq — yarımadanıñ bütün umumtasil mekteplerini köstergen interaktiv haritadır. Servis yardımınen ana-babalar kerekli oquv yurtunı tapıp, qırımtatar sınıfınıñ açılması içün ariza berip, istegenler cedveline qoşula bileler.
İdarecilerniñ qayd etkenine köre, belli bir mektepte yeterli sayıda ariza toplanğan soñ, iştirakçilerni nevbetteki areketlerni idare etmek içün birleştirecekler. Olarnıñ malümatına köre, milliy sınıfnı açmaq içün altı bala yeterlidir.
Leyhanıñ teşebbüsçileri qayd eteler ki, ana-babalarnıñ çoqusı balaları qırımtatar tilinde tasil almasını istegen diger qorantalar aqqında bilmey. İşte bu sebepten yañı harita fikirdeşlerni tapmağa yardım etmeli ve milliy tasilniñ talabını daa çoq kösterecek.
QRM qayd ete ki, Qırımda qırımtatar tilini ögrenmek içün imkânlar sıñırlı olıp qala, ana tilinde dersler açmaq ise sıq qıyın ola. Olarnıñ fikirince, böyle teşebbüsler qırımtatar tilini saqlap qalmasına ve kelecek nesillerge ögretmesine yardım ete.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız