İşğal etilgen Qırımda Rusiye teşviqatı kütleviy haber vastaları öz Telegram kanallarında RF Silâlı quvetlerine askerlikke aluvnı ilân etken yayınlarnıñ sayısını bayağı arttırdılar.
Çiçek ayınıñ 22-nde Facebookta "Sarı şerit" cemaat areketi bu aqqında haber etti.
Faalcilerniñ qayd etkenine köre, bu kibi reklamlar eñ çoq "Krım 24" teşviqiy neşiri tarafından yapılğan — 300 yayın. Bu cedvelde yarımadada işğalli müessiseler de bar, şu cümleden Emek nazirligi (110), Medeniyet nazirligi (99), Haber ve Malümat nazirlikleri (97).
Olarnıñ malümatına köre, bu reklama kampaniyasına "bölük polisleri" celp etildi, olar muqavelecilerniñ planını yerine ketirmek kerekler.
Bundan da ğayrı, yarımadanıñ işğalli memuriyetleri ve "polis" hadimleri RF Silâlı quvetleri ile añlaşma imzalamağa celp etilgen er bir insan içün para alalar.
Faalciler, Rusiyede sistematik işke aluv buhranını qayd ettiler: maaşlarnıñ rekord seviyesine baqmadan, muqavelerniñ alınması eksilmekte.
"Rusiye 2026 senesi 409 biñ askerni celp etmege planlaştıra, şunıñ içün işğal etilgen topraqlarğa, hususan Qırımğa, basqı artacaq. 2015 senesinden 2025 senesine qadar Qırımda qanunsız askerlikke çağıruv sebebinden eñ az 53 biñ insan Rusiye ordusına yollanıldı", — dep areketniñ koordinatorları qayd ettiler.
Ukrayina prezidentiniñ Qırım Muhtar Cumhuriyetindeki temsilciliginiñ qayd etilgenine köre, işğal etilgen Qırımda gençler Rusiye ordusına askerlikke alına ve arbiy taqımlarğa celp etile.
Müessiseniñ malümatına köre, Qırım gençleri içün işğalcilerden berilgen millionlarnen para — işğal iqtisadiyatnı, tasilni ve istiqbalni yoq etken bölgede yekâne içtimaiy asansör kibi körüne.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız