Tsivilsk şeeriniñ TM-9de tutulğan Arsen Abhayirovğa tibbiy yardım kösterilmey — varikoz damarlarına ameliyat tarihı uzatıla, baş ve arqa ağrısı içün paracetamoldan ğayrı ilâclar berilmey.
Siyasiy mabüsniñ apayı Azize Abhayirovağa atıf etip, "Qırım birdemligi" bu aqqında haber berdi.
O, aqayını bu sene kiçik aynıñ soñunda — saban ayının başında uzun bir körüşüvde kördi.
"Qırımtatar 2023 senesi mayıs ayında tibbiy yardım kerek olğanı aqqında bildirdi. O vaqıt onıñ apayı aytqanı kibi, bu varikoz "eski" ve apishanede daa beter oldı. Hususan, Yeniseysk (Krasnoyarsk vilâyeti) apishanesinde adam saba saat altıdan saat 22:00ge qadar turmağa mecbur edi", — dep haberde qayd etildi.
Azize Abhayirovanıñ aytqanına köre, keçken sene ilk yaz ayında apishanede aqayına ayaqlarınıñ ultrason yaptırğanlar, amma neticelerini ögrenmege imkân bermediler ve apayına kopiyasını yollamadılar.
"Bundan ğayrı, Abhayirovnı baş ve bel ağrısı raatsızlay edi. O, tibbiy bölükke barğanda, ekimler oña tek paracetamol apını bereler. Aynı zamanda, onı yüksek ve "eñ alçaq" basımnıñ deñişmesi de raatsızlay. Siyasiy mabüsniñ apayı qayd ete ki, böyle dalğalanmalarnıñ sebebi şimdilik belgilenmedi", — dep "Qırım birdemligi" yazdı.
Qırımtatarnıñ apayı aytqanı kibi, aqayı işhanede aftada altı kün çalışa, onı umumiy rejimde tutalar, yılda dört posılka ya da yollama ala bile, em de er dört ayda bir kere soy-soplarınen uzun körüşüvlerde ola bile. Arsen Abhayirovnı ŞİZOğa yerleştirmediler.
"Hizb ut-Tahrir davası"nıñ Qurman gruppası aqqında ne bilemiz
2019 senesi kiçik aynıñ 14-ünde Qurman rayonınıñ (Krasnogvardiysk rayonı) Büyük Onlar qasabasında bu gruppanıñ üç iştirakçisi tutuldı.
2020 senesi boş aynıñ 3-ünde Rostov-na-Donudaki Cenübiy bölge arbiy makemesi, davanıñ iştirakçilerini maküm etti. RF CQniñ 205.5. maddesiniñ 1. qımsına ("Terror teşkilâtınıñ faayiyeti") mücibi Rustem Emiruseinovnı 17 senege, RF CQniñ 205.5. maddesiniñ 2. qısmına ("Terror teşkilâtınıñ faaliyetinde iştirak etüv") mücibi Eskender Abdulganiyevni 12 senege ve Arsen Abhayirovnı 13 senege maküm etti.
Epilerini Rusiyede yasaqlanğan, amma Ukrainada ve dünyanıñ ülkeleriniñ çoqusında serbest şekilde faat etken siyasiy islâm fırqası Hizb ut-Tahrirge ait olmaqta qabaatladılar.
Hizb ut-Tahrir, islâm siyasiy fırqasıdır. 2003 senesi Rusiyede o, terrorcı bir teşkilât olaraq tanındı, oña bağlı olğan insanlarnı ise taqip etmege başladılar. İştirakçileri, "qanunlarğa qarşı faaliyet"te ve böyle degen "cian hilâfeti"ni yaratmağa ıntılmağa qabaatlanalar. 2014 senesi Qırım işğal etilgen soñ işğalcilerniñ qanunları zapt etilgen Qırımda da qullanılmağa başlandı. Qırımlı musulmanlarnı da Hizb ut-Tahrirge bağlı olmaqta qabaatlamağa başladılar, böylece yarımadanıñ işğaline qarşı olğanı sebebinden qırımtatarlarğa basım arttı.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız