İşğalciler Qırımdan ukrayin arbiy hızmetçisi İğor Movenkoğa qarşı "devlet hainligi" içün yañı cinaiy dava açtılar. Rusiye onı "aşırıcılıq"ta qabaatlap, taqip ete edi.
Qırımtatar Resurs Merkezi bu aqqında haber etti.
İğor Movenkonıñ QRMe bildirgenine köre, onı "devlet hainligi" ve "Ukrayina Silâlı quvetleri terkibinde RFa qarşı arbiy areketlerde iştirak etüv"de qabaatlaylar.
O, işğalli qurulışlarnıñ böyle areketlerini saçmalıq dep adlandırdı, Ukrayina vatandaşı olğanını ve bu sebepten "Rusiyege hainlik" qabaatlavı uquqiy ceetten boş ve siyasiy sebepli olğanını qayd etti.
İğor Movenko aqqında ne bilemiz
2014 senesi Qırım Rusiye tarafından işğal etilgende İğor Movenko Sevastopolda (AqyarRusiye imperiyası ve Şuralar Birligi tarafından Qırımnıñ meskün yerleriniñ adlarını deñiştirüv islâatından evelki adda) yaşay edi. O, dj edi ve ukrayin timsallerini köstere edi. Şu cümleden, Ukrayina Milliy gvardiyasınıñ "Azov" mahsus brigadasınıñ 12-nci brigadası emblemi ve Ukrayina tuğrasınen yazılğan levhası içün onı 2016 senesi "Berkut"nıñ sabıq hadimi soqaqta urdı ve "polis"ke teslim etti.
İşğalli quvetçiler Movenkoğa qarşı içtimaiy ağlarda "aşırıcı çağıruvlar" içün dava açtılar. 2018 senesi onı müstemlekede eki yılğa üküm etildi, apellâtsiya cezasını — eki yıl şartlı olaraq — yımşattı. Bundan evel o, bir buçuq ay SİZOda tutuldı. Onıñ fikirince, onı qorquzmaq içün yapılğan bir şey.
"Vazifesi meni qorqutmaq içün edi. Bundan soñ meni Qırımnı terk etmege çağıra ediler — ya da müddet kerçek olacaqtır. Men eki yıl devamında evden çıqıp olamay edim. Eki yıl keçken soñ, biz bütün qorantamıznen köçtik", — dep o ayttı.
Kıyivde qorantası yañıdan yaşamağa başladı. Movenkonıñ apayı Valentinanıñ aytqanına köre, köçüvni daa çoq qızı begendi, çünki ukrayin tarafdarı olğanı içün Sevastopol (Aqyar) mektebinde zorbalıq kördi.
"Anda balalar da aqıldan tüşürilgen edi. Mektepke pek çoq bala kele edi. Bir yerden, bir yerden... Fizikiy zorbalıq da oldı", — dep o ayttı.
2022 senesi Movenko ticariy anbarnı idare ete edi, qorantası Kıyivde yaşayışını qurdı. Rusiyeniñ Ukrayinağa istilâsınıñ birinci künü o, arbiy komissarlıqqa ketti.
"Aqiqaten, 2014 senesi Donbasqa barmağa istegen edim. Amma anda ketsem, Qırımda qalğan qorantamda meseleler olacağını añlay edim... 2022 senesi ise, men pek tüşünmegen edim, bilgen edim ki, borcum bar. O, öylece ketti", — dep arbiy hızmetçi tarif etti.
2024 senesi ilk qış ayınıñ 25-nde Ukrayina prezidenti Volodımır Zelenskıy İğor Movenkonı "Ukrayinanıñ arbiy hızmeti içün" medalinen taqdirledi.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız