12 yılğa mahküm etilgen qırımtatar Zavur Abdullayev Vladimirdeki 2-nci apishaneden Tambovdaki 1-nci tüzetüv müstemlekesine etap etildi.
"Qırım birdemligi"ne onıñ apayı Emine Abdullayeva bunı bildirdi.
Emine Abdullayevanıñ sözlerine köre, qara qış ayınıñ 30-nda onıñ aqayı karantin kamerasından soñ umumiy bölükke avuştırıldı. Onıñ aytqanına köre, onıñ içün bu etap pek qıyın edi.
"Lâkin o iç bir vaqıt şikâyet etmey, er vaqıt: 'Alhamdülillâh, er şey yahşı' dey", — dep siyasiy mabüsniñ apayı tarif etti.
Onıñ aytqanına köre, Zavur Abdullayev sağlıq vaziyetini nezaret etmege devam ete: qan şekeri ve qan basımını muntazam sürette kontrol ete, em de kerekli ilâclarnı ala.
Hatırlatamız ki, Rusiye müstemlekesinde Qırım siyasiy mabüsi Zavur Abdullayevniñ sağlıq vaziyeti fenalaştı. Onıñ şeker hastalığı, qan basımı ve körme qabiliyeti bozula, em de tişleri fenalaşa.
"Basımdan zarar köre, körme qabiliyeti fenalaşıp tura. O, acele tiş ekimi yardımına muhtac, çünki onıñ 10-12 sağlam tişi qaldı, qalğanları qırıla", — dep Emine tarif etti.
"Hizb ut-Tahrir davası"nıñ ekinci Aqyar gruppası aqqında ne bilemiz
2021 senesi arman ayınıñ 17-sinde işğal etilgen Qırımda rus quvetçileri, qırımtatarlarnıñ evlerini kütleviy olaraq tintken soñ beş qırımtatar adamını tuttılar: Aqyarnıñ Nahimov rayonından faalci Rustem Murasov ve Rustem Tayirov, Balıqlava rayonından Cebbar Bekirov, Bağçasaray rayonında faalci Zavur Abdullaev ve Aqmescit rayonından Reyif Fevziev.
O zaman Musarov ekinci kere tutuldı. Birinci kere 2016 senesi kiçik ayda tutuldı, amma birazdan azat etildi. Bu sefer ise faalci Rostov-na-Donudaki qırımtatarlarnıñ dava oturışlarından qaytqan soñ tutuldı. Öz halqınıñ temsilcilerini destek etmek maqsadınen o yerge ketti.
Hizb ut-Tahrir, islâm siyasiy fırqasıdır. 2003 senesi Rusiyede o, terrorcı bir teşkilât olaraq tanındı, oña bağlı olğan insanlarnı ise taqip etmege başladılar. İştirakçileri, "qanunlarğa qarşı faaliyet"te ve böyle degen "cian hilâfeti"ni yaratmağa ıntılmağa qabaatlanalar. 2014 senesi Qırım işğal etilgen soñ işğalcilerniñ qanunları zapt etilgen Qırımda da qullanılmağa başlandı. Qırımlı musulmanlarnı da Hizb ut-Tahrirge bağlı olmaqta qabaatlamağa başladılar, böylece yarımadanıñ işğaline qarşı olğanı sebebinden qırımtatarlarğa basım arttı.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız