Azaq-Qara deñiz havzasında balıq tutuluvı, tam miqyaslı istilâ başlağanından berli eksildi ve şimdi 2018—2021 seneleri seviyelerinde buluna. Sebepler arasında cenk ve ekologik meseleler bar.
Qırım reintegratsiyası birligi bu aqqında bildire.
İşğalciler Aqyarda (SevastopoldaRusiye imperiyası ve Şuralar Birligi tarafından Qırımnıñ meskün yerleriniñ adlarını deñiştirüv islâatından evelki ad) 2024 senesine baqqanda balıq tutuluvınıñ 50% arttırılacağını bildireler. RİA Novosti Qırım bu aqqında bildire.
Qırım reintegratsiya birleşmesinde qayd eteler ki, rusiyeliler 2022 senesinden başlap balıq tutuluvı eksildi, dep aytmaylar. Bu raqamlar tam bir istilâdan evel olğan raqamlardan az.
"Aqiqatta, "Qırım balığı" umumiy avnıñ payı olaraq, 2022 senesine nisbeten bayağı eksildi", — dep haberde aytıla.
Qara qış ayında Ukrayina prezidentiniñ Qırımdaki temsilcisi (2017—2018 seneleri) Boris Babin "Qırımtatar resurs merkezi"ne bergen izaatında aytqanı kibi, işğal yılları devamında Qırımda balıq tutuluvı 2014 senesi 15,5 biñ tonnadan 4,7 biñ tonnağa qadar eksildi.
Ekspertniñ fikirince, bir qaç sebep bar — Rusiye Ukrayinağa qarşı tecavuzı, işğalciler avlanma rayonlarını sıñırladı. Onıñ aytqanına köre, Rusiyeniñ areketleri neticesinde yüz bergen ekologik felâketler de tesir etti.
"Vaziyetke aynı tecavuz sebebinden olğan felâketler de tesir ete - rusiyelilerniñ Kahovskaya HES damınıñ patlavı ve Keriç boğazında "Volgoneft" tankerleriniñ felâketinden soñ biñlernen tonna mazutnıñ tökülmesi", — dep ekspert qayd etti.
Hatırlatamız, Rusiyeniñ Krasnodar ülkesinde Anapa plâjları, 2024 senesi ilk qış ayında Keriç boğazında "Volgoneft" tankerleriniñ qazası neticesinde yağulıq ile kirsetilgen kirlenüv sebebinden qapatıla. Olarnı turistler mevsimi başlağanına qadar açıp olamazlar. Bunı Rospotrebnadzor yolbaşçısı Anna Popova, Federatsiya Şurasında ükümet saatında çıqışta bulunıp bildirdi, dep "Agentsiya" rus neşiri yaza.
İşğal etilgen Qırımnıñ özenlerinde de himiyeviy kirlenüv normalarınıñ aşılması qayd etildi — suv anbarlarında nitrit ve ammionik azot tapıldı, dep haber ete RİA "Novosti Qırım" işğalci "Qırım gidrometeorologiya ve etraftaki müit monitoringi idaresiniñ" tedqiqlerine atfı etip.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız