25 yaşındaki İT hadimi Oleksandr Kaçkurkin siyasiy sebeplerden işğal etilgen Qırımdan Qazahistanğa köçip, Almatı şeerinde yaşağan edi. 2014 senesi yarımada işğal etilgen soñ o, işğalcilerniñ mecbur etkenleri rusiye vatandaşlığını aldı. Qazahistandan sürgünlik ceryanında ruslar onı uçaqta apiske aldılar ve Moskva mahkemesiniñ qararına binaen, "devlet hainligi" davası çerçivesinde SİZOğa yolladılar.
"Pervıy otdel" uquq qorçalayıcı leyhası Telegramda bu aqqında haber berdi.
"Kaçkurkin İT saasında DevOps müendisiProgramma işlep çıqaruv (Dev) ve ameliyatlar (Ops) arasındaki ceryanlarnı avtomatlaştırğan, yañılanmalarnıñ tez, işançlı çıqarılmasını ve astyapınıñ stabilligini teminlegen İT mütehassısı ve işlep çıqaruvcısı olaraq çalıştı ve, tanışlarınıñ aytqanlarına köre, OpenAI — ChatGPT çatbotınıñ yaratıcısınen işbirlik yaptı. Bu sene qara qış ayında Almatı polisi, uyğun olmağan yerde yerden keçkeni ve qapalı odada nargile çekkeni içün oña qarşı eki memuriy protokol tizdi. Mahkeme, eki protokolğa esaslanıp, onı sürgün etmege qarar çıqardı", — dep haberde qayd etildi.
"Pervıy otdel" insan aqları leyhasına köre, eki memuriy raport da uydurılğan edi, onı memleketten sürgün etmek qararı tek bir qaç saat devam etti, amma bu protsedura adet üzre aftalar, bazıda ise aylar devam ete. Uçaq qonğan soñ adamnı tutıp, mahkemege berdiler. Uquq qorçalayıcılarnıñ aytqanına köre, "devlet hainligi" davasınıñ açılğanınıñ sebebi Ukrayinağa para yollanmaları oldı.
"Qonğan soñ deral Kaçkurkinni tap uçaqta tutıp, mahkemege alıp kettiler, bu mahkeme qabaatlanğannı apske yolladı. Rusiyede o, Ukrayinağa para yollağanı içün devlet hainliginde qabaatlana. Rusiye Federatsiyası Ceza qanunnamesiniñ 275-nci maddesine köre, Oleksandr 1 yıldan başlap ömürlik cezasına mahküm etile bilir. Rusiye quvetçileriniñ insanlarnı taqip etmeleri içün Qazahistan uquq qorçalayıcı organları ve qanınlarınıñ qullanılmasını köremiz. Qayd etmek kerekmiz: Qazahistan atta Ukrayina vatandaşları içün havfsız ve qanunlı devlet olmaqtan vazgeçe", — dep leyhanıñ advokatı Yevheniy Smırnov bildirdi.
Hatırlatamız ki, işğal etilgen Yaltada FSB 34 yaşındaki Lüdmıla Kolesnikovanı yaqaladı. Qadın Qırımğa ağır hasta anasınen sağlıqlaşmaq içün İrlandiyadan kelgen. İşğalciler onı "devlet hainligi" davası çerçivesinde 17 yılğa "mahküm ettiler". "Tribunal. Qırım epizodı" leyhasınıñ menbaları haber ettiler ki, işğal teşkerüvinde qabaatlav ukrayin ordusına hayriye bahşışlarına ait edi.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız