İşğalci "Qırım yolbaşçısı" Sergey Aksönov bildirdi ki, şimdi Qırım aliy oquv yurtlarında 34 biñden ziyade student oquy, Rusiye işğaline qadar olarnıñ sayısı aman-aman 60 biñ edi. Bugün yarımadada tahminen biñ talebe — Ukrayinağa qarşı cenk iştirakçisi ya da olarnıñ aile azalarıdır.
Aksönov Telegramda, Rusiyede qara qış ayınıñ 25-nde qayd etilgen Studentler künü munasebetinen bu aqqında yazdı.
"Bugün Qırım aliy oquv yurtlarında 34 biñden ziyade student oquy. Bu cumhuriyetniñ intellektual ve insan resursıdır, Qırımnıñ kelecegi içün mesüliyetni öz boynuna ala bilecek büyük küçtir. Studentler cemiyet-siyasiy yaşayışta iştirak ete, bir çoq göñülli, vatanperver, ekologik, medeniy ve sport tedbirlerini teşkil ete. Müellimler ve talebeler cebege yardım ete, ög saflarında olğanlar içün gumanitar yardım toplay, yaralanğan askerlerni tedaviyley. Regionımıznıñ aliy oquv yurtlarında 270-ten ziyade "SVO" iştirakçisi ve qoruyıcılarımıznıñ 750-den ziyade balası oquy", — dep Aksönov yazdı.
"Almenda" esabatınıñ müellifleri bergen Ukrayina Devlet statistika hızmetiniñ malümatına köre, Qırım ve Aqyarda (SevastopoldaRusiye imperiyası ve Şuralar Birligi tarafından Qırımnıñ meskün yerleriniñ adlarını deñiştirüv islâatından evelki ad) Rusiye işğalinden evel aman-aman 60 biñ student oquy edi.
"2013-2014 oquv yılında Qırım Muhtar Cumhuriyetinde 26 I-IV dereceli aliy oquv yurtı (7 universitet, 2 akademiya, 2 institut, 7 kollec, 4 oquv yurtı ve 4 tehnikum) bar edi, olarda 45 biñden ziyade student oquy edi. Aqyarda (Sevastopolda) 10 aliy oquv yurtı bar edi (3 universitet, 1 akademiya, 1 institut, 1 kollec, 2 oquv yurtı ve 2 tehnikum), anda 14,7 biñ student oquy edi", — dep haberde aytıla.
Bundan evel Suspilne Qırım, Qırım diplomları ne dünyada, ne de Rusiyede tanılmay, dep bildirgen edi. Rusiyeniñ dostları olğan bazı Latin Amerika ve Afrika memleketleri istisna olalar. Şu cümleden Burundi, Gvineya, Kamerun, Mali, Sudan, Uganda ve Venesuela. Qırımlılarnıñ problemleri tek işğal altındaki Qırım aliy oquv yurtlarınıñ diplomları ile degil de, mektep attestatları ile de peyda ola.
Bu sebepten Qırım aliy oquv yurtlarınıñ studentleri soñki oquv yılında Rusiye diplomını almaq içün Rusiye Federatsiyasınıñ aliy oquv yurtlarına keçmege tırışalar. Amma Rusiyeniñ bütün meşur aliy oquv yurtları, sanktsiyalarğa oğramaqtan qorqıp, qırımlılarğa razı olmay.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız