İşğal etilgen Qırımda Rusiye memurları Rusiyege qarşı sanktsiyalar sebebinden 2031 senesine qadar elektrik energiyası qıtlığını tahmin eteler. İşğal etilgen yarımada ve Krasnodar ülkesinde ecnebiy donatmalar tamir etilmese ya da olar Rusiyege deñiştirilmese, elektrik energiyasınıñ umumiy qıtlığı eñ az 2 biñ MVt teşkil eter, dep tahmin etile.
"Kommersant" Rusiye media-holdingi, Rusiyeniñ cenübiy energetik sisteması birleşken dispetçer idaresiniñ baş müdiri Vâçeslav Afanasyevniñ beyanatına esaslanıp, bu aqqında yazdı.
Rusiye memurınıñ añlatqanına köre, çetel qurulışları tamir etilmeli, amma Rusiyege qarşı kirsetilgen sanktsiyalar şaraitinde bunı yapmaq imkânsızdır. 2031 senesine qadar bu donatma bütünley bozulır.
"Qırımda ve Krasnodar ülkesinde 2031 senesine qadar 2 biñ MVt seviyesinde elektrik energiyası qıtlığı tahmin etile, çünki sanktsiyalar şaraitinde ecnebiy donatmalarnı tamir etip olamay. Qırım yarımadasında ve Kubanıñ cenübiy-ğarbiy rayonında vaziyet kerginleşecek. Soçi rayonında elektrik teminatınen bağlı meseleler olacaqtır, lâkin Olimpiadağa qadar anda bayağı energetik obyektler quruldı", — dep neşir yazdı.
"Energetikler eminler ki, 2031 senesine qadar vaziyet kritik olacaq, şunıñ içün Rusiye istisalınıñ yedek generatsiya küçleri qurulmalı. Aynı zamanda bu ceryan yerli turbinalarnıñ inkişafı ve istisalınen bağlı qıyınlıqlar sebebinden yavaşlay", — dep maqaleniñ müellifleri qoştılar.
Daa evel "Rosteh" Rusiye devlet korporatsiyasınıñ "Tehnopromeksport" şirketi bildirdi ki, işğal etilgen Qırımda Simferopol (AqmescitRusiye imperiyası ve Şuralar Birligi tarafından Qırımnıñ meskün yerleriniñ adlarını deñiştirüv islâatından evelki ad) civarında 135 MVt taqatınen "Trudova" yañı gaz turbina elektrik stantsiyasını qurmağa planlaştıra. Rusiye devlet şirketi bildirdi ki, onı eñ çoq çalışqan saatlerde ağğa qoşmağa isteyler.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız