İşğal etilgen Qırımda Rusiye arbiy bölükleri ve FSB sıñır bölüklerinde hadimler qıtlığı qayd etile. Yarımada sakinlerini bu hızmetke celp etmek içün, soqaqlarda ilânlar peyda oldı.
Qırım uquq qorçalayıcılarından biri Qırım.Aqiqatqa anonimlik şartınen bunı bildirdi.
Onıñ malümatına köre, parklarda, cemaat naqliyatınıñ toqtatılğan yerlerinde, ilân levhalarında, hususan Simferopolnıñ (AqmescitRusiye imperiyası ve Şuralar Birligi tarafından Qırımnıñ meskün yerleriniñ adlarını deñiştirüv islâatından evelki adniñ) çoq qatlı evlerinde, Rusiye Federatsiyasınıñ uquq qorçalayıcı organlarına hızmetke çağıruv ilânları yapıştırılğan.
"Rusiyeniñ Ukryainağa qarşı büyük cenkinden evel, FSBniñ ilânlar esasında hadimlerni toplağanını tasavvur etmek qıyın edi. Şimdi bu kerçektir. Bütün malümatlarğa köre, Qırım sakinleriniñ pek azı istilâcı memleketniñ sıñır hızmetine ketmege azır, bu ise qırımlılar arasında Ukrayina tarafdarları duyğusınıñ saqlanuvını köstere. Qırım işğal etilgen soñ, mında qomşu Rusiyeniñ bölgelerinden sıñırcılar ketirildi, amma tolu miqyaslı cenk başlağan soñ, Rusiye özünde sıñırcılar qıtlığı peyda olğanı içün qırımlılar arasında hadimlerni qıdırmağa mecbur oldı. Menim malümatıma köre, biñlernen Rusiye sıñırcıları Rusiye Federatsiyasınıñ bütün sıñır bölüklerinden Kursk vilâyetindeki uruşlarda iştirak etmek içün yolğa çıqtı, çoqusı öz bölüklerine qaytmadı — o vaqıttan berli Rusiye sıñır bölüklerinde adamlarnıñ sayısı bayağı arttı", — dep uquq qorçalayıcı bildirdi.
Uquq qorçalayıcınıñ malümatına köre, Rusiye arbiy bölükleri de ilânlar boyunca reberliklerini toldurmağa tırışa.
"Rusiye bölükleri endi Ukrayina cebinden rekrutingnen oğraşa. Aydın olğanına köre, olarnıñ askerler taqımınen büyük bir mesele bar. Bu sebepten Rusiye akimiyetiniñ RF Mudafaa nazirliginen añlaşma imzalamağa istegenlerniñ sayısı çoq olğanı aqqında bildirüvleri informatsion manipulâtsiya kibi körüne", — dep uquq qorçalayıcı qayd etti.
Hatırlatamız ki, bu yazda işğal etilgen Simferopolda (Aqmescitte) Rusiye arbiy hızmetçileriniñ mankenleri RF ordusında añlaşma boyunca hızmet etüv reklamasınen peyda oldı. Manekenler merkeziy soqaqlarda, memuriyet binalarınıñ yanında, yatqan yerlerde ve yalılarda tura. Böyle teşviqat evelden Melitopolda, Donetskte ve Mariupolda qayd etilgen edi.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız