İşğal etilgen Qırımda, Aluşta içün esas suv menbası olğan Körbekül yapma gölü aman-aman yoq oldı.
İlk qış ayınıñ 17-nde "Patriot Donbasu" neşiri bu aqqında haber etti.
Jurnalistler, bu yapma gölüniñ ilk qış ayındaki vaziyetini köstergen fotolarnı derc ettiler.
Körbekül yapma gölü 1979 senesi Ulu Özen özeninde Aluştanıñ suv teminlevi içün quruldı. Qırımnıñ eñ teren yeri sayıla edi — 70 metrge qadar edi. Onıñ uzunlığı 4 kilometr.
Bu sene arman ayında "Voda Krıma" işğalli müessisesiniñ "reber"i Maksim Novik, Qırımdaki Körbekül yapma gölüniñ suv yedekleri 4,8 mln m3 teşkil etkenini, bu ise tolu miqdarınıñ 38%-ini teşkil etkenini bildirdi. Onıñ aytqanına köre, bu yedekler 2025 senesiniñ soñuna qadar yeter.
Orta küz ayında işğal etilgen Aluşta bağlı olğan Körbekül yapma gölü 24%-ge tolu edi, işğalli mütehassıslarnıñ bildirgenlerine köre, bu 2,5 ayğa yete bilir edi.
İlk qış ayınıñ 6-nda Qırımnıñ yapma gölleriniñ suv yedekleriniñ eksilüvinen qarşılaşqanını bildirdiler. Hususan, Sabla yapma gölünde 4-5 ayğa, Ayan yapma gölünde ise yarım yılğa yetecek suv bar.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız