İşğal etilgen Qırımda Rusiye quvetçileri "devlet hainligi"nde qabaatlanğan daa 8 insannı — 5 erkek ve 3 qadınnı "yaqaladılar".
Facebookta Qırımtatar resurs merkeziniñ idare reisi Eskender Bariiev bunı bildirdi.
"Ukrayina haber alanı memleketimizniñ tarihında eñ büyük qabarcılıq qavğası aqqında munaqaşalarnen tolu olğan bu künlerde men, buña baqmadan, işğal etilgen Qırımda daa 8 adam — Andriy Brühanov, Hudak Taras, Çauş Enver, Tsırık Olğa, Kutsenko Ğlib, Revut Anatoliy, Melnıçuk Evelina, Dâkunovskay Tetâna — devlet hainligi içün apiske alınğanını ögrendim", — dep Bariiev yazdı.
Eskender Bariievniñ derc etkeni cedvelde Olğa Tsırıknıñ adı añıla — işğalciler onı "SVO askerleri"ni zeerlemek ıntıluvında şübheli sayalar, onı bir yıldan ziyade 2-nci SİZOnıñ bazasında yerleşken FSB mahsus apishanesinde inkommunikada alında tuta ediler.
İşğalcilerniñ versiyasına köre, qadın 2023 senesi ilk küz ayında WhatsApp messenceri vastasınen Ukrayina mahsus hızmetlerinen bağlandı. Gemilerniñ yerleşüvi aqqında malümattan ğayrı, o, Sevastopolda (AqyarRusiye imperiyası ve Şuralar Birligi tarafından Qırımnıñ meskün yerleriniñ adlarını deñiştirüv islâatından evelki adda) arbiy tehnika ve arbiy hadimlerniñ areketleri aqqında malümat bere edi. "Tribunal. Qırım epizodı" kanalına yarımadanıñ apis sistemasından bir menba bildirdi.
Qayd etilgen Qırım siyasiy mabüsleriniñ çoqusı aqqında açıq menbalarda söz yürsetilmey — işğalciler siyasiy mabüslerniñ şahsiy malümatlarını gizleyler, şunıñ içün cenk şaraitinde qanunsız "cezalar"nıñ tafsilâtlarını ögrenmek qıyın.
Meselâ, işğalli "Qırım Yuqarı mahkemesi" 22 yaşındaki Keriç sakini Ukrayina mahsus hızmetlerine Rusiye arbiy hızmetçileriniñ koordinatlarını bergeni sebebinden sert rejimli müstemlekede 14 yılğa qanunsız olaraq üküm etti — oña "devlet hainligi" maddesini berdiler. İşğalli uquq qorçalayıcılar "mahkeme" qararından soñ da adamnıñ adını ve soyadını derc etmediler.
"Bu tevqifler sade bir şeyni isbatlay: işğal ne qadar devam etse de, Qırımdaki Ukrayina vatandaşları rus tili, bayrağı ve qanunsız akimiyetnen barışmazlar. Olar Rusiye oyun qaidelerini qabul etmediler, işğalciniñ tarafını tutmadılar ve Rusiye işğali altında yaşamağa istemeyler. İnsanlar serbest, demokratik ve mustaqil memlekette yaşamağa istegenleri içün qarşılıq köstermege devam eteler", — dep Bariiev qoştı.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız