Qırım siyasiy mabüsi Ğennadiy Osmaknıñ Rusiyeniñ Vladimir vilâyetindeki Melekovo 6-ncı sert rejimli müstemlekesine etapapiske alınğanlarnıñ mecburiy keçirilüviı yekünlendi. Qanunsız etap eki ay devam etti, bu vaqıt devamında soy-sopları siyasiy mabüsniñ taqdiri aqqında bir şey bilmey ediler.
Qırımtatar Resurs Merkezi bunı bildirdi.
"Ğennadiy etap vaqtında şiddetli fizikiy ve ruhiy işkencege oğradı, ve bütün bu vaqıt devamında qorantasınen alâqası yoq edi. Müstemlekege kelgen soñ, o, tuvğanlarına bulunğan yeri aqqında qısqa malümat berip oldı", — dep QRM bildirdi.
Tuvğanları onıñ şeker hastalığı içün kerek olğan ilâclarğa irişiminiñ olmağanını ögrendiler.
"Netice olaraq, onıñ sağlığı bayağı fenalaştı. Qorantası, onıñ ayatına telüke doğurğan ilâcnı koloniyağa teslim etip olamay", — dep haberde qayd etildi.
Ğennadiy Osmaknıñ qanunsız "dava"sınen bağlı mahkeme toplaşuvı ilk qış ayınıñ 11-ne belgilendi.
"Advokat qanunsız apis müddetiniñ qısqartılmasını talap etecek ola, çünki jurnalistniñ işğalci onı qabaatlamağa tırışqan şeyge iç bir alâqası yoq edi. Ğennadiy Osmak Geniçeskte yaşağan ve yerli "Novıy vizıt" neşiriniñ yolbaşçısı edi. 2024 senesi saban ayında onı işğalciler tutıp aldılar, Rusiye tarafından "terror teşkilâtı" olaraq tanılğan Noman Çelebicihan adına qırımtatar batalyonında iştirak etkeninde qabaatladı", — dep QRM añlattı.
İşğalli "mahkeme" oña qanunsız olaraq 3 yıl ve 2 aylıq apis cezasını berdi.
"Ceza vaqtında jurnalistni işkencege oğrattılar, neticesinde ağır aqibetleri oldı — şeker hastalığı ve bel hastalığı yaralandı", — dep merkez bildirdi.
Qırımtatar Resurs Merkezi halqara teşkilâtlarnı, hususan Halqara Qızıl Haç Eyyetini, vaziyetke acele cevap bermege ve siyasiy mabüsniñ sağlıq vaziyetini teşkermek içün oña irişmege çağıra.
Читати ще
Telegram, WhatsApp, Facebook, TikTok ve YouTubede Suspilne Qırım haberlerine abune oluñız