İşğal etilgen Qırımda yarımada sakinlerine qarşı basqı dalğası devam ete. Soñki afta devamında işğalci mahkemeler "devlet hainligi", "terror teşkilâtında iştirak etüv", "ekstremizm" qabaatlavları boyunca ükümlerni qabul ettiler. FSB insanlarnı içtimaiy ağlardaki tefsirleri içün tutıp, Ukrayina mahsus hızmetlerinen işbirlikte bulunğanında qabaatlay.
Suspilne Qırım işğal etilgen yarımadada keçken afta yüz bergen qanunsız qarar ve tevqiflerniñ cedvelini derc etti.
17 yıllıq apis cezası, malümatnı ukrain istihbaratına "bergen" içün
Vaqtınca işğal etilgen Qırımda Qara deñiz rayonınıñ Olenivka köyüniñ sakini 17 yıl sert rejimli koloniyada qalmasına üküm etildi. İşğalci Qırım Yuqarı mahkemesi aqaynı devlet hainliginde qabaatladı.
FSB versiyasına köre, Qırım sakini "WhatsApp ve Signal" messencerleri vastasınen Ukrayina istihbaratına Qara deñiz yalısındaki Rusiye arbiy obyektleri ve noqtaları aqqında malümat berdi". Müessise, elde etilgen malümat "ücüm ve ava operatsiyalarınıñ planlaştırılması içün qullanıla bile", dep bildirdi.
O, 200 biñ rublelik (tahminen 100 biñ grivna) para cezasını aldı. Apellâtsion mahkemesi ükümni deñiştirmedi. Mahküm etilgenniñ adı aydınlatılmay.
Rostovdaki mahkeme "Qırım köprüne ücüm etmek çağıruvları" sebebinden Sevastopol (AqyarRusiye imperiyası ve Şuralar Birligi tarafından Qırımnıñ meskün yerleriniñ adlarını deñiştirüv islâatından evelki ad) sakininiñ davasını baqacaq
Qırımnıñ işğalci akimiyeti Rostov-na-Donu Cenübiy okrugınıñ arbiy mahkemesine Sevastopolnıñ (Aqyarnıñ) 22 yaşındaki sakini davasını berdi. Onı içtimaiy ağlarda "terrorizmge açıq çağıruvlar" ve "terroristik faaliyetni aqlağanı" ile qabaatlaylar.
Rusiye tahqiqatınıñ malümatına köre, adam 2024 senesi saban ayından 2025 senesi çiçek ayına qadar "Ukrayina neşirlerini tesfir ete edi" "Qırım köprü ve Vladimir Putinniñ rezidentsiyasına ücüm etmege" çağırğan tefsirlerni yerleştirgen. Bundan da ğayrı, o, "RFnıñ Kursk vilâyetinde ukrayin arbiyleriniñ areketlerini aqlağanını" bildirdi.
Onı yedi yılğa qadar azatlıqtan marum etecekler. Davanı Rostov-na-Donu arbiy mahkemesi baqacaq, o, siyasiy sebepli Qırım davalarında qabaatlanğanlarğa muntazam sürette üküm çıqara.
Canköy rayonınıñ sakinlerini "terror teşkilâtında iştirak etüvde" qabaatlaylar
İşğal etilgen Qırımnıñ Canköy rayonınıñ bir qaç sakini Rostov-na-Donu şeerine mahkemege teslim etildi. Olarnı "terror teşkilâtında iştirak etüvde" qabaatlaylar, sanki olar Rusiyede yasaq etilgen diniy teşkilâtnen bağlı.
İşğalci kütleviy haber vastalarınıñ bildirgenine köre, taqiqat, tutulğanlar "Qırım musulmanları arasında dünya halifeliginiñ ğayesini tarqatqanını" ve "yañı tarafdarlarnı celp etkenini" tüşüne. Şübelerniñ adları ve qabaatlarınıñ delilleri aydınlatılmay.
Mahküm etilgenler 20 yılğa qadar apis cezasını ala bile. Uquq qoruyıcılar qayd etkenine köre, bunıñ kibi qabaatlavlar qırımtatarlarnı ve Qırım musulmanlarını taqip etmek içün sıq qullanıla.
Sudaqnıñ 61 yaşındaki sakini Facebookta yazğanları içün yaqalandı
RF FSB, Rusiyede blok etilgen Facebook içtimaiy ağında yazğanları içün Sudaqnıñ 61 yaşındaki sakini yaqalandı, dep bildirdi. O, "ekstremizmge çağıruvlar" ile qabaatlandı.
Rusiye müessisesiniñ beyanatında qayd etile ki, ekspertiza metinlerde "ruslarğa qarşı zorbalıq areketlerine çağıruv işaretlerini" taptı. Tintüv vaqtında ondan telefonı ve kompyuter tehnikası alındı.
Onı beş yılğa qadar koloniyada qala bileler. Tahqiqat, qabaatlavnı tasdıqlağan konkret malümat ya da delillerni köstermey.
Qırımda ukrayin yırı içün para cezasını lâğu ettiler
İşğalci akimiyetniñ nezaretindeki Qırım Yuqarı mahkemesi Bağçasaraydaki "Atmosfera" klubınıñ müdirine 300 biñ rublelik para cezasını lâğu etti. O, Verka Serdüçkanıñ "Ukrayina ölmedi" yırını icra etkeni içün para cezasını aldı.
Davanı yañıdan baqmağa yolladılar, çünki mahkeme oturışuvında yañlış şahıs celp etildi, oña dair memuriy vesiqalar tizilgen edi. Mahkeme, bu "protsessual aqlarnı temin etmege imkân bermey", dep tanıdı.
İşğalci akimiyet ukrayin yırlarınıñ icrasınen bağlı cezalarnı lâğu etken ilk belli vaqia oldı. Uquq qorçalayıcılarnıñ fikirince, bu qarar evelden alınğan bir qarar ola bile.
Eki qırımlı "Qırım qamaçavında iştirak etkeni içün" mahküm etildi
Qırımnıñ işğalci mahkemeleri eki Ukrayina vatandaşını mahküm etti — 62 yaşındaki Osman Kadırovnı, 56 yaşındaki Edvard Asanovnı. Olarnı "qanunsız silâlı birleşmede iştirak etüvde" qabaatladılar.
Qırımtatar resurs merkeziniñ malümatına köre, saqat Kadırov başta eki yıl koloniyada qalmasına üküm etildi, soñra ise ükümni beş yılğa qadar arttırdılar. Asanov 8,5 yıl apis cezasını aldı — onı "vatandaşlıq qamaçavı vaqtında aşçı olıp çalışqanında" qabaatladılar.
"İşğalci akimiyetniñ barışıqlı vatandaşlıq narazılıq aktsiyasında iştirak etüvni cinaiy saymağa sistemli ıntıluvını köremiz", — dep QMC reisi Eskender Bariyev qayd etti.
70 yaşındaki “Yehova Şaatları” azasına 6 yıl sınav müddeti berildi
Rusiye kontrolindeki Qırımnıñ Razdolnensk rayon mahkemesi, 70 yaşındaki Tamara Bratsevağa üküm çıqardı. Onı "ekstremist teşkilâtınıñ faaliyetini teşkil etüvde" qabaatladılar.
Taqiqatnıñ malümatına köre, Brattseva 2021-2024 seneleri dindaşlarınen onlayn toplaşuvlar keçire edi. Prokurorlıq apis cezasını talap etti, amma mahkeme şartlı apis cezasını berdi.
"Eger men ekstremizmnen oğraşqan olsa edim, men Yehovan Şaatları olamay edim, çünki men endi Mukaddes Kitabıñ talaplarına uymağan edim", — o toplaşuvda dedi. Soñki yedi yıl içinde Qırımda "Yehova Şaatları" taqip etilüvi eñ azından 30 insannı raatsızladı.
Keriçte ukrayin alim Leonid Pşenıçnovnı yaqaladılar
Rusiye quvetçileri berim ayında Keriçte ukrayin Antarktika tedqiqatçısı Leonid Pşenıçnovnı tutıp aldı. O, 40 yıldan ziyade deñiz ekosistemlerini qorçalamaqnen oğraştı.
Ukrayina prezidentiniñ QMC temsilciligi qanunsız apis etilüvini takbih etti ve halqara toplulıqnı alimniñ azat etilmesini talap etmege çağırdı. "Ukrayina, ilimnen oğraşqan vatandaşlarğa qarşı siyasiy repressiyalarnı toqtatmağa talap ete", — dep beyanatta aytıla.
Pşenıçnov Antarktika deñiz canlı resurslarınıñ saqlanuvı boyunca komissiyasında (CCAMLR) Ukrayinanı temsil ete edi, anda o, etraftaki müitniñ qoruvı standartlarınıñ azırlanuvı üzerinde çalıştı.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız