Herson vilâyetiniñ vaqtınca işğal etilgen Novooleksiyivka şeeriniñ 58 yaşındaki sakini Nariman Derman adlı qırımtatar Rusiye vatandaşlığından marum etildi. 2024 senesi orta küz ayında Noman Çelebicihan batalyonında Qırım qamaçavında iştirak etkeni içün 3,5 yılğa apiske alındı. Epilepsiya hastalığı sebebinden ekinci gruppa saqatlığı olğanına baqmadan, adam RFnıñ Yuqarı Ural sert rejimli müstemlekesinde tutula.
"Gratı" neşiri bu aqqında haber etti.
Bu qararnı Herson vilâyetindeki Rusiye İçki işler nazirligi 2025 senesi ilk yaz ayında "Vatandaşlıq aqqında" qanunınıñ 22-nci maddesine esaslanıp, "cinayet işlegeni"ni sebep olaraq qabul etti.
Nariman Rusiye pasportını 2023 senesi mayıs ayında — Herson vilâyetiniñ bir qısmı işğal etilgen soñ aldı. Şimdi, vatandaşlığı olmağanı içün, o evine qaytıp, yaşav vesiqalarını alamaz. Onıñ apayı Zera Derman neşirge bildirdi ki, o, bu qararğa itiraz bildirmege tırışa, amma "ümeti az".
2024 senesi orta küz ayında Derman Noman Çelebicihan batalyonında iştirak etkeni içün müstemlekede 3,5 yılğa üküm etildi. O, qabaatını red etip, barışıq aktsiyasınıñ iştirakçisi olğanını ayta. Rusiye mahkemesi, mahkeme oturışı vaqtında zalda epilepsiyağa oğrağanına baqmadan, onıñ saqatlığını körmemezlikke urdı.
"Memorial" merkezi Dermannı siyasiy mabüs olaraq tanıdı. Uquq qorçalayıcılar qayd eteler ki, batalyonda iştirak etüv cinayet degil, onıñ faaliyeti ise ukrayin sıñırcılarınen uyğunlaştırılğan edi.
Qırımtatar Resurs Merkezi bildirdi ki, işğalli qurulışlarnıñ areketleri halqara uquqnıñ qaba bozuluvı ve işğal etilgen Qırım sakinlerini qorquzuv siyasetiniñ bir qısmı ola.
Hatırlatamız ki, Qırım işğal etilgeninden berli ruslar yarımadada yaşağan Ukrayina vatandaşlarına öz pasportlarını bermege mecbur ettiler. Soñ 300 Qırım sakini Rusiye vatandaşları olaraq mahküm etildi. Şimdi işğalli akimiyet bu siyasiy mabüslerni Rusiye vatandaşlığından marum etmege başladı. Qanunsız apis müddetleri bitecek soñ, olarnı sürgün etecekler.
2023 senesi Rusiyede qanunnı qabul ettiler, o, belli uquq bozuvları içün vatandaşlıqnı coya bile. Bu sene böyle "sebepler" cedveli kenişletildi.
"Başta olar qanun vaqtınca işğal etilgen topraqlarğa — Herson, Zaporijjâ, Qırım, Donetsk ve Luğansk vilâyetlerine — ait olmaycaq, dep bildirdiler. Amma şimdi de anda qullanıla. 238-inci madde aqqında laf kete — casuslıq, terrorizm, diger devletlernen işbirlik. Bu eñ evelâ işğal etilgen topraqlarda yaşağan vatandaşlarımızğa aittir", — dep Suspilne Qırımğa Qırımtatar resurs merkeziniñ reisi Eskender Bariiev ayttı.
Onıñ aytqanına köre, eñ az beş Qırım siyasiy mabüsi Rusiye vatandaşlığından marum etildi. Olarnıñ arasında — Ekrem Mamedov, Lenur Seydametov, Nasrullah Seydaliev, Marlen Mustafayev ve Vladislav Afanasyev.
Ukrayina prezidentiniñ Qırım Muhtar Cumhuriyetindeki temsilcisi Olğa Kurışko, mecburiy Rusiye vatandaşlığı ne Ukrayina, ne de halqara toplulıq tarafından tanılğanını ve böyle bir ameliyat halqara uquqqa zıt kelgenini qayd etti.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız