Sevastopolda (AqyarRusiye imperiyası ve Şuralar Birligi tarafından Qırımnıñ meskün yerleriniñ adlarını deñiştirüv islâatından evelki adda) "mahkeme" tarafından "devlet hainligi" içün 15 yılğa mahküm etilgen siyasiy mabüs Oksana Senecuk, Rusiyeniñ Burât Ulusınıñ Ulan-Ude şeerindeki 7-nci qadın müstemlekesine avuştırıla. Etap 2024 senesi oraq ayınıñ 14-nden devam ete, lâkin soñki noqtası daa belli degil.
İlk küz ayınıñ 9-nda onıñ qızı Mariya Kostük ZMINA neşirine bunı bildirdi.
Onıñ qayd etkenine köre, anası — evden bu qadar uzaqqa yollanılğan siyasiy mabüslerden tek qadın. Senecuk, onı Qırımğa yaqınlaştırmağa rica etse de, işğalli akimiyet bunı red etti.
Oksana Senecuk aqqında ne bilemiz
Oksana Senecuk 2024 senesi arman ayınıñ 14-nde iş yerinde tutuldı, aynı yılnıñ ilk qış ayınıñ 26-nda ise işğalli Sevastopol (Aqyar) mahkemesi tarafından mahküm etildi.
Rusiye Baş prokurorlığınıñ malümatına köre, qadın "Qara deñiz flotunıñ gemilerini fotoğa çeke ve bu fotolarnı Ukrayina istihbaratına bere edi". Ukrayina uquq qorçalayıcı teşkilâtları umumiy beyanatnı derc etip, bildirdiler ki, Oksana Senecuknıñ apiske alınmasınıñ kerçek sebebi onıñ siyasiy baqışları ve Rusiye Federatsiyasınıñ Ukrayinağa qarşı istilâsını mahküm etmesidir.
Qırım işğal etilmeden evel o, Sevastopol (Aqyar) şeer memuriyetinde çalışqan edi, soñra ise şeer qurucılığı ve mimarcılığı ilmiy-tedqiqat institutınıñ baş mütehassısı oldı. O, ayrıca, Portaqal inqilâbı ve Yeromaydanda faal iştirak etti.
Senecuknıñ ayatı ve apiske alınması aqqında tafsilâtlıca Suspilne Qırım jurnalistleri Oksananıñ qızı Mariya Kostük, onıñ tanışı Tetâna Rıhtun ve uquq qorçalayıcı Olğa Skrıpnık ile subetleştiler.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız