Ukrayina Tış işler nazirligi Ukrayina institutınen beraber, Ukrayin ve qırımtatar tilleriniñ dünyada populârlaştırılması içün "Хвиля / Dalğa" mukâfatını teşkil ete.
Facebookta Ukrayina tış işler naziri Andriy Sıbiğa bunı bildirdi.
"Til ögretüvine ve populârlaştırılmasına büyük isse qoşqan ocalar, alimler ve medeniy erbaplarğa "Dalğa"nı berecekmiz. Bu mukâfat bizler içün ukrayin ve qırımtatar tilleriniñ Ukrayinanıñ medeniy diplomatiyasınıñ ayırılmaz qısmı olaraq, aynı zamanda dünyada milliy menfaatlarnıñ ilerilemesi ve milliy havfsızlıqnıñ pekitilmesinde hızmet etkenini qayd etmek içün bir fırsat ola. 2025 senesi ilk küz ayınıñ 10-na qadar faalcilerni tayinlemege çağıralar. Tafsilâtlı malümatnı Ukrayina İnstitutı ve TİNniñ saifelerinde tapmaq mümkün", — dep Andriy Sıbiğa yazdı.
Bu mukâfat aşağıdaki muvafaqiyetler içün berilecek:
- ukrayin ya da qırımtatar tilinden ecnebiy til olaraq oquv ve ilmiy işlerniñ yaratılması;
- tetqiqatlarınıñ başlanuvı ya da inkişafı; ögretüvde müim muvafaqiyetler;
- dünyada tillerniñ populârlaştırılmasına bağışlanğan tedbirlerniñ teşkil etilmesi ve keçirilmesi", — dep nazir yazdı.
Mukâfatqa namzetlerni ukrayin ve çetel medeniy institutları, tedqiq merkezleri, ilmiy merkezler, Ukrayina çetel diplomatik müessiseleri, diaspora teşkilâtları ve jüri azaları teklif ete bileler.
Mukâfat laureatları Ukrayina institutınıñ yardımınen para mukâfatı, çalışmaq ve faaliyetini teşviq etmek içün yañı imkânlar alacaqlar.
İlk laureatlarnıñ tantanalı mukâfatlandıruv merasimi 2025 senesi orta küz ayınıñ başında keçirilecek.
Читати ще
Telegram, WhatsApp, Facebook, TikTok ve YouTubede Suspilne Qırım haberlerine abune oluñız