21 ve 22 yaşındaki eki Qırım sakini işğal etilgen yarımadadan Ukrayina Prezidentiniñ "Bring Kids Back UA" teşebbüsi çerçivesinde Ukrayinağa qaytarıldı.
Arman ayınıñ 22-nde Telegramda Prezident ofisiniñ yolbaşçısı Andriy Yermak bunı bildirdi.
"Eki vatandaşımıznı vaqtınca işğal etilgen Qırımdan qaytarıp oldıq — 21 ve 22 yaşındaki oğlanlar. Olar işğal şaraitinde ösip, daimiy basqı ve aşağılavnı körgenler. Çoq vaqıt devamında çıqmağa imkânları yoq edi. Şimdi olar evlerinde, serbest Ukrayinada bulunalar. Ailelerinen beraber. Ve öz kelecegini qurmaq aqqınen", — dep haberde qayd etildi.
Hatırlatamız ki, arman ayınıñ 19-nda teşebbüs çerçivesinde eki bala qaytarıldı, arman yınıñ 18-nde ise işğalden 12 bala qaytarıldı.
Rusiyeniñ ukrayin balalarını hırsızlavı aqqında ne bilemiz
Prezidentniñ bala aqları boyunca vekâletlisi Darya Gerasımçuk, 2023 senesi saban ayınıñ soñuna qadar Ukrayina akimiyeti bildirdi ki, VİETdan Rusiyege çıqarılğan 19,5 biñden ziyade balası aqqında bile, amma işğal sebebinden olarnı saymaq qıyın.
2023 senesi çiçek ayınıñ 5-nde dünyanıñ 49 memleketi Rusiye Federatsiyasını vaqtınca işğal etilgen topraqlardan ukrayin balalarınıñ hırsızlanmasınıñ qanuniy sebeplerine dair Havfsızlıq şurasınıñ toplaşuvını teşkil etkeni içün taqbih etti. Büyük Britaniya Rusiyeniñ bala aqları vekâletlisi Lvova-Belovanıñ Birleşken Milletler Teşkilâtında çıqışınıñ yayınlanmasını blok etip, onı Gaagadaki mahkemede areketleri içün cevap bermesine çağırdı.
Baş prokurorlıqnıñ ofisi qayd etti ki, Rusiyege sürgün etilgen ukrayin balalarını qaytarmaq içün tek bir de bir şeffaf algoritm ya da mehanizm yoq.
2023 senesi saban ayınıñ 17-nde HCM Putin ve Lvova-Belovağa tevqif qararı çıqardı. Olarnı qanunsız sürgün etüv ve ukrayin balalarını köçürüvde qabaatlaylar.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız