İşğal etilgen Qırımda Rusiye akimiyeti gençlerni Ukrayina tarafdarı olğanları ve barışıq aktsiyalarında iştirak etkenleri içün taqip ete. Qırımtatar resurs merkeziniñ (QRM) malümatına köre, 55 genç repressiyalarnıñ qurbanı oldı: 19-ı SİZOda, daa 36-sı — Rusiye Federatsiyasınıñ müstemlekelerinde buluna.
Arman ayınıñ 13-nde QRM öz saytında bu aqqında haber etti.
Rusiye Federatsiyasınıñ müstemlekelerinde ve tutulğanlar arasında "terrorizm", "devlet hainligi" ya da "aşırıcılıq"ta qabaatlanğan onlarnen Qırım gençi bar. Olarnıñ arasında:
- Abdulganiyev Eskender (27 yaşında) — "Hizb ut-Tahrir"de iştirak etkeni içün 12 yıl;
- Abduraimov Eldar (26 yaşında) — "terrorizmge qoltutqanı" içün 16 yıl;
- Ziza BoĞdan (30 yaşında) — mavı-sarı boyanen narazılıq aktsiyası içün 15 yıl;
- Yeltsova Ğanna (24 yaşında) — içtimaiy ağlardaki yazıları içün 5,5 yıl;
- Horoşayev Valentın (23 yaşında) — arbiy komissarlıqnı yaqqanı içün 12 yıl;
- Hatice Büyühcan, 24 yaşında, "terrorizm" ve "devlet hainligi" içün ömür boyu apis cezasına mahküm etile bile.
"Qırım ve diger işğal etilgen topraqlar Ukrayina nezareti altına tezce qaytması içün er birimiz elimizden kelgenini yapmaq kerekmiz, gençler barışıq, serbestlik şaraitinde inkişaf eteler, arbiy alanda degil de, esas Ukrayinada keyfiyetli tasil ala bileler", - dep Merkez qayd etti.
Bundan evel QRM, Birleşken Milletler Teşkilâtınıñ ırqçılıqnıñ zemaneviy şekilleri meselelerinden mahsus maruzacısına "Qırım işğali kontekstinde ırqçılıq, diskriminatsiya ve silâlı zıddiyet" adlı maruzanı berdi. O, Birleşken Milletler Teşkilâtınıñ Baş Assambleyasınıñ 80-nci sessiyasında çıqarılğan maruzada qayd etile.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız