Ukrayina mahkemesine 2014 senesi "Qırım öz-özüni mudafaa etüvi" qanunsız silâlı birleşmesiniñ erkânında "polknıñ ştab yolbaşçısı" vazifesini eda etken Ukrayina vatandaşına qarşı qabaatlav aktı berildi. O, 15 yılğa üküm etile bile.
Arman ayınıñ 13-nde Qırım MC ve Sevastopol (AqyarRusiye imperiyası ve Şuralar Birligi tarafından Qırımnıñ meskün yerleriniñ adlarını deñiştirüv islâatından evelki ad) şeer prokurorlığı bunı bildirdi.
Erkekni aşağıdaki maddelerge binaen qabaatlaylar:
- qanunda qayd etilmegen silâlı birleşmeniñ faaliyetinde iştirak etüv, müessiseler ve teşkilâtlarğa ücüm (Ukrayina Ceza qanunnamesiniñ 260-ıncı maddesiniñ 4-ünci qısmı);
- devlet hainligi (Ukrayina Ceza qanunnamesiniñ 111-inci maddesiniñ 1-inci qısmı);
- Ukrayina topraq bütünligine qast etüv (Ukrayina Ceza qanunnamesiniñ 110-ncı maddesiniñ 2-nci qısmı).
Tahqiqatnıñ malümatına köre, 2014 senesi kiçik ayda qabaatlanğan adam askerlerniñ areketlerini idare ete, patrullarnı teşkil ete, blok noqtalarını teşkil ete, em de Qırım toprağında strategik obyektlerniñ — vokzallar, ava limanları ve devlet müessiseleriniñ — işini nezaret ete edi.
Bundan ğayrı, müessisede qayd ettiler ki, o, yarımadanıñ "Rusiyege qoşulması" boyunca qanunsız referendumnıñ keçirilmesini temin etüvde iştirak etti. Faaliyeti içün işğalli akimiyet onı "Qırım Cumhuriyetini qorçalav içün" medali ve diger mukâfatlarnen taqdirledi.
Hatırlatamız ki, Ukrayinada "Sevastopol öz-özüni mudafaa etüvi" qanunsız silâlı birleşmesiniñ iştirakçisini de mahküm etecekler. O, 2014 senesi Qırımda "Orlov köprü" blok noqtasınıñ komandanı oldı ve Sevastopol (Aqyar) tarafına ketkenlerni teşkere edi. O, üç UCQniñ maddesine binaen 15 yılğa üküm etile bile.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız