Sanktsiya altında bulunğan "Artek" lagerinde keçirilgen "Bala barışıq sammiti" teşviqat tedbirinde 30 memleketten 300 bala iştirak ete. İşğal etilgen Qırımda bu tedbir, Kremlge sadıq olacaq yañı nesil yetiştirmek ıntıluvı ola bile.
Milliy muqavemet merkezi bunı bildirdi.
"Rusiye kene de özüni "barışçı" olaraq köstermege tırışa, bu sefer işğal etilgen Qırımda "Balalar sammiti"nde balalarnı Kreml teşviqatında qullana. Onıñ maqsadı — "Rusiyeniñ kerçek sureti"ni ve "kelecekke baqış"nı yaratmaqtır. Asılında ise — istilâcını qanuniyleştirmek ve Kremlge sadıq olğan yañı nesil yetiştirmek ıntıluvıdır", — dep MMM ayttı.
Milliy muqavemet merkezi qayd etti ki, işğal etilgen Qırımda Rusiye tarafından "Artek" lagerini arbiyleştirüv aletine çevirdiler — anda arbiy oyunlar keçirile, arbiy cinayetçilernen körüşüvler keçirile, "vatandaşlıq terbiyesi" adı altında tecavuz yüceltile.
Bundan evel MMM, Ukrayinağa qarşı cenkte iştirak etken Rusiye arbiyleri işğal etilgen Qırımnıñ cenübiy yalısındaki "Artek" bala lagerinde reabilitatsiya keçkenini bildirdi.
Qırım işğal etilgen soñ Rusiye akimiyeti "Artek" bala merkezini "milliyleştirdi", soñra mülküni Rusiyege berdi.
Ukrayina Tış işler nazirligi UNESCO, halqara teşkilâtlar ve dünya toplulığını "Artek"niñ Rusiye Federatsiyasına berilmesini takbih etmege çağırdı. Nazirlik qayd etti ki, 2006 senesi Ukrayina ükümeti ve UNESCO arasında "Artek" halqara bala merkezi" Ukrayina devlet müessisesi içün UNESCO imayesi altında merkez statusınıñ berilmesi aqqında añlaşma imzalandı.
QMC prokurorlığı 2015 senesi çiçek ayında işğal etilgen Qırımda "Artek" şirketiniñ "milliyleştirilüvi" sebebinden cinaiy dava açtı. 2016 senesi çiçek ayında Kıyivniñ Obolon mahkemesi "Artek" mülküni tevqif etti. Qırım işğal etilgen soñ "Artek" Ukrayina qıtaiy qısmına köçti ve Kıyiv civarındaki Puşça-Vodıtsâda bulundı. Rusiyeniñ Ukrayinağa istilâsı başlağanından berli müessise Kıyiv vilâyetinden Zakarpattâğa tahliye etildi.
Avropa Birligi yarımada işğal etilgen soñ Rusiye Federatsiyasınıñ Tasil nazirliginiñ nezareti altında bulunğan "Artek" lageri içün sanktsiyalar kirsetti.
2023 senesi arman ayında AQŞ Ukrayinadan balalarnı zorbalıqnen alıp ketken Rusiyeden bir sıra uquqiy ve fizikiy şahıslarğa qarşı sanktsiyalar kirsetti. Cedvelge Rusiyeniñ "Artek" Halqara bala merkezi" Federal devlet bücet tasil müessisesi de kirdi.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız