Qırımda işğalciler Sevastopolnıñ (AqyarRusiye imperiyası ve Şuralar Birligi tarafından Qırımnıñ meskün yerleriniñ adlarını deñiştirüv islâatından evelki adnıñ) eki sakinini devlet hainliginde qabaatladılar. Olarnı Ukrayina mahsus hızmetleriniñ vekillerinen işbirlikte bulunğanlarında ve Baş istihbarat idaresine Rusiye arbiy obyektleri aqqında malümat bergenlerinde şübheli sayalar.
RİA "Novosti Krım" bunı bildirdi.
"Genç qadın Rusiye Federatsiyasınıñ havfsızlığına qarşı Ukrayina vekillerinen gizli işbirlik yapmağa qarar berdi. Bu faaliyetke anasını qoştı. 2023 senesi ilk küz ayında o, anası tarafından yapılğan Rusiye Federatsiyası Silâlı quvetleriniñ obyektleriniñ fotoresimlerini, UMNniñ Bİİniñ kontrol etkeni kanalğa internet-messenceri vastasınen yolladı", — dep aytıla haberde.
Baş istihbarat idaresi bu davağa izaat bermedi.
Hatırlatamız ki, Qırım uquq qorçalayıcı gruppasınıñ malümatına köre, 2025 senesiniñ başında işğal etilgen Qırımda ve Rusiye Federatsiyasında sahte davalar sebebinden eñ az 250 Ukrayina vatandaşı apiste buluna edi. Siyasiy mabüslerniñ bir qısmı yarımadada, digerleri — RF toprağında tutula.
Qırım uquq qorçalayıcı gruppasınıñ idare reisi Olğa Skrıpnıknıñ aytqanına köre, işğalli akimiyet cinaiy davalarnı repressiyalar içün alet olaraq qullanmağa devam ete. Eñ çoq qırımtatarlar zarar kördi — 108 insan, esasen bu cemiyetniñ vekilleri, uydurılğan qabaatlavlarnen mahküm etildi.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız