Rusiye tarafından Özbekistanğa teslim etilecek olğan Lenur Seydametov Samaranıñ 1-nci SİZOsında buluna. Mayısnıñ 15-ne qadar anda qalacaq.
Onıñ apayı Aciye Seydametova Suspilne Qırımğa bunı bildirdi.
"Bugün aqayım Seydametov Lenur birinci kere telefon etti. Şimdi o Samarnıñ 1-nci SİZOnda buluna. Mayısnıñ 15-ne qadar qalacaq, dep ayttı. Oña ileride Novosibirskke ketecegini ayttılar, amma soñki noqtası bildirilmedi", — dedi o.
Hatırlatamız ki, işğalciler şimdi Rusiye Federatsiyasında qanunsız apiste tutulğan eki Qırımtatar Nasrulla Seydaliev ve Lenur Seydametovnı Özbekistanğa sürgün etmege qorqutalar.
Aciye Seydametovanıñ aytqanına köre, aqayı Özbekistandan Qırımğa 2012 senesi köçti ve onıñ yaşama ruhsetnamesi bar.
"O, bütün protseduralarnı keçti: vaqtınca yaşamaq içün izin, kiriş-çıqış ve ilâhre. 2014 senesi pasportnı almaq kerek olğanda ise, vaqtı yetmedi. Mektüpte o, Voronej SİZOsında bulunğanını yazdı. Onıñ aytqanına köre, başta onı dağıtım merkezine yolladılar, amma anda onı red ettiler. O, Özbekistanğa ekstraditsiya etilecek, dep añlattılar", — dep Qırımtatarnıñ apayı qayd etti.
Lenur Seydametovnıñ Ukrayina vatandaşınen resmiyleştirilgen nikâhı ve yaşayış ruhsetnamesi olsa da, Rusiye apishanesinden soñ Ukrayinağa qaytmaq içün bu yeterli degil edi. Bunı Özbekistandaki Ukrayina elçiliginiñ birinci kâtibi, vaqtınca işğal etilgen topraqlar meseleleri naziriniñ sabıq muavini Yusuf Kürkçi bildirdi.
"Lenur aqqında aytsaq, menim añlağanıma köre, o Özbekistan vatandaşıdır. Oña em Özbekistannıñ, em de istilâcı memleketniñ qanunları uyğulacaq. İç bir şey yapıp olamaymız, çünki uquqiy ceetten buña alâqamız yoq. İnsan işğal etilgen topraqta yaşay edi, amma Özbekistan vatandaşı pasportı bar edi", — dedi o.
"Qırım SOS" cemaat teşkilâtınıñ leyha koordinatorı Oleksiy Tilnenkonıñ aytqanına köre, Lenur Seydametov Özbekistanğa ekstraditsiya etilse, bu, Rusiye akimiyeti tarafından mahküm etilgen siyasiy mabüsniñ Ukrayinanıñ vaqtınca işğal etilgen topraqlarından üçünci memleketke çıqarılmasınıñ birinci vaziyeti olacaq.
Hatırlatamız ki, Rusiye işğalcileri üçünci Simferopol (AqmescitRusiye imperiyası ve Şuralar Birligi tarafından Qırımnıñ meskün yerleriniñ adlarını deñiştirüv islâatından evelki ad) gruppasınıñ iştirakçisi Lenur Seydametovnı "Hizb ut-Tahrir davası" çerçivesinde 13 yılğa mahküm ettiler.
Hizb ut-Tahrir, islâm siyasiy fırqasıdır. 2003 senesi Rusiyede o, terrorcı bir teşkilât olaraq tanındı, oña bağlı olğan insanlarnı ise taqip etmege başladılar. İştirakçileri, "qanunlarğa qarşı faaliyet"te ve böyle degen "cian hilâfeti"ni yaratmağa ıntılmağa qabaatlanalar. 2014 senesi Qırım işğal etilgen soñ işğalcilerniñ qanunları zapt etilgen Qırımda da qullanılmağa başlandı. Qırımlı musulmanlarnı da Hizb ut-Tahrirge bağlı olmaqta qabaatlamağa başladılar, böylece yarımadanıñ işğaline qarşı olğanı sebebinden qırımtatarlarğa basım arttı.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız