"Qırımnıñ Birinci aftası" mayısnıñ 12-nde Brüsselde başlandı. O, mayısnıñ 16-na qadar devam etecek. Tedbirlerniñ maqsadı: işğal etilgen Qırımda yaşağan insanlarğa diqqat ayırmaq ve olarnıñ aqlarını qorçalamaqtır.
Qırım uquq qoröalayıcı gruppası bunı bildirdi.
"Topraqlar degil, insanlar müimdir. Qırımğa sıq-sıq tek coğrafik ve strategik emiyeti içün baqalar. Aksine, Brüsselde keçken Qırım aftası insanlarğa, olarnıñ aqlarına ve demokratik siyasetçilerniñ diqqat ve faal areketlerine muhtac olğanına diqqatnı celp ete. Bu teşebbüs Qırımda insanlarnıñ — hususan, sistemli repressiyalarğa baqmadan, işğalcilerge qarşılıq köstermege ve muqavemet areketlerine qoşulmağa devam etken Qırımtatarlarnıñ, uquq qorçalayıcılarnıñ ve mustaqil jurnalistlerniñ kerçeklerini aydınlatacaq", — dep aytıla haberde.
Qırım aftası Ukrayina ve halqara cemaat sektorınıñ temsilcileri tarafından Avropa Birligi institutlarınıñ işbirliginen teşkil etildi.
Mayısnıñ 12-nde açılışı olıp keçti, Crimean Tatars: back to the roots filmi kösterildi. Bir aftalıq programmada: panel munaqaşaları, Qırımtatarlar aqqında filmlerniñ kösterilmesi, Avropa parlamentinde Qırımda insan aqlarınıñ bozuluvı aqqında sessiya ve diger tedbirler.
Salı, mayısnıñ 13-ü
Saat: 12:30-13:30 Tedbir: Avropa Parlamentinde Qırım Aftası Sessiyası; yer: Avropa Parlamenti, 5G2 odası.
Saat: 15:00-16:30 Tedbir: Qırımnıñ serbest sesleri: vatandaş jurnalistikası ve işğal altında tirenüv; yer: Avropa Parlamentiniñ İnfohabı
Çarşenbe künü, mayısnıñ 14-ü
Saat: 15:00-17:30; Tedbir: "Qorçalav aqqı yoq" vesiqalı filminiñ kösterilüvi; yer: Avropa parlamentiniñ İnfohabı.
Cumaaqşamı, mayısnıñ 15-i
Saat: 15:00-18:00; Tedbir: Rusiye işğali altında ayat: hırsızlanğan balalıq ve vatandaş reineleri; yer: Avropa tış işler hızmeti
Cuma, mayısnıñ 16-sı
Saat: 14:00-16:00; Tedbir: İşğal altındaki balalıq: indoktrinatsiya, arbiyleştirüv ve taqip etüv Sergi: "U(CRIME)A"; Yer: Brüssel azat universiteti, B1.315 odası.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız