Kıyivde Qırımtatar halqınıñ genotsid fedalarınıñ hatıra kününe bağışlanğan "Accı badem çiçegi açqan yerde..." adlı unikal medeniy-bediiy sergi açıldı. Ekspozitsiyada Qırımtatar medeniyetiniñ terenligi, acısı ve güzelligi aks etilgen qoqla kompozitsiyaları, sanat eserleri, arhiv kitapları ve teatr sergisi birleştirile.
Sergini Suspilne Qırım mühbiri ziyaret etti.
Serginiñ esas maqsadı — Qırımtatar medeniyetinen bağnı sanat, tedqiqat ve canlı hatıra vastasınen yañıdan tiklemek. Bu, endi üç yıldır Qırımtatar medeniyetini tedqiq etken, saqlağan ve populârlaştırğan "Qırımtatar studiyaları" büyük halqara leyhasınıñ bir qısmıdır. "Birlik School" talebeleri tarafından azırlanğan "Accı badem çiçegi açqan yerde..." adlı teatrleştirilgen numayış tedbirniñ temeli oldı.
"Bu ğaye daa 2022 senesi boş ayda peyda oldı. Men ve qoqla ustaları, bütün dünyadan 40 ustanen bayramlarnı, urbalarnı, ananelerni ögrenip, 63 kompozitsiyanı yarattıq. Er bir qoqla — bir ikâye, bir menba, bir müzey hatıraları. Bundan da ğayrı, sergi de olacaq — bu unikal bir şey. Şimdi Kıyivde cenkte yaşağan balalar sürgünlikniñ qorqunçlı vaqiaları aqqında tarif eteler", — dep sergi teşkilâtçısı, "Ukrayinanıñ merasim medeniyeti" cemaat teşkilâtınıñ reisi Valeriya Levkivska tarif etti.
Sergide hususiy yerni mimar ve ressam Vitaliy Vlasükniñ 60-70-nci senelerinden etüdlernen yapılğan resimleri ala.
"Qırım — pek güzel bir yer. Anda er bir taş — bir abide. O vaqıt resim yapa edim, bugün ise bu manzaralarnı yañıdan tüşünem. Bu resimler — yarımadada qalğan yüregimdir", — dep Vlasük hatırlay.
Tedbirniñ musafiri, Qırımtatar Milliy Meclisi reisiniñ birinci muavini Nariman Celâl, halqlar arasında hatıra ve destekniñ müimligini qayd etti.
"Bizler qorqunç cinayetniñ añma kününde toplandıq. Ukrayinliler bu acını yahşı añlaylar — olar özleri de pek qorqunçlı şeylerni başından keçirdiler — açlıq, ziyalılarnıñ öldürüvi ve daa çoq başqa şeyler. Ve şimdi bizler beraberlikte devletimizniñ serbestligi, mustaqilligi ve bütünligi içün küreşemiz. Bunı unutmamalımız", — dep Celâl qayd etti.
Rejissör Ahtem Seitablayev medeniyetniñ yoq etilmemesini qayd etti
"Rusiye İmperiyası bizni yoq etmege istese de, bizler sizlernen berabermiz. Şuralar Birligi bizni yoq etmege istese de, biz ve siz barmız. Ölüvni istegenler ğayıp olacaqlar. Sevgen ve yaratqa biz ise yaşaycaqmız. Bu sergi bunı isbatlay", — dep qayd etti o.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız