Ukrayinada işğal etilgen Qırımdan devlet içinde alınğan 1 million 300 biñ qorantanı meskennen temin etmek kerek. Umumen, 2 million 800 biñ insan DAK statusını aldı.
Ukrayina cemiyetler ve topraqlar inkişafı naziriniñ muavini Natalâ Kozlovska "İnkişaf nazirliginiñ yañı vekâletleriniñ 100 künü" matbuat konferentsiyası vaqtında bunı bildirdi.
Onıñ qayd etkenine köre, bu raqamlar, işğal etilgen topraqlardan ya da arbiy areketler alanından çıqqan insanlarnıñ umumiy sayısını esaplap, tahminiy bir raqamdır.
Memurnıñ malümatına köre, "eVidnovlennâ" programması çerçivesinde zarar körgen evler içün 8,9 milliard ğrıvnâ miqdarında 89 179 qoranta tazminat aldı. Bundan da ğayrı, evleri yoq etilgen 8604 qoranta 14,4 milliard ğrıvnâğa ev aldı.
"Yıqılğan evler içün tazminat leyhası aqqında aytsaq, onı Avropa Şurası İnkişaf Bankınen beraber yerine ketiremiz. Keçenlerde bank 100 million yevro miqdarında leyhanı devam etmege qarar aldı. Bu, ortaqlarnıñ şunı añlağanını köstere: bu leyha çerçivesinde yerine ketirilgen protsedura ve esnaslar açıq ve maqsatqa irişmege imkân bere", — dedi Natalâ Kozlovska.
Bundan ğayrı, Dünya Bankı 84 million dollarlıq "Yıqılğan evler içün tazminat" leyhasını maliye etmege devam ete.
Hatırlatamız ki, 2025 senesi qara qış ayınıñ 6-nda Ukrayina prezidenti 3703-IX qanunını imzaladı, o, "Yerli öz-özüni idare etüv aqqında" qanunına kompleks deñişmeler kirsete. Şu cümleden, devlet içinde alınğan kişiler (DAK) endi resmiy olaraq yaşağan yerleriniñ sakinleri olaraq tanılalar.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız